ەرتەڭ، 25 قازان كۇنى رەسپۋبليكا سارايىندا الەمدىك بايقاۋلاردىڭ جەڭىمپازدارى، Temirlan & Yernat دۋەتىنىڭ العاشقى «ALEM TOUR» اتتى جەكە شىعارماشىلىق كەشى وتەدى.
قازاقستاننىڭ دامۋ جولىنداعى جەتىستىكتەرىن اتاپ وتەتىن ۇلتتىق مەرەكە – رەسپۋبليكا كۇنىمەن تۇسپا-تۇس كەلگەن كونسەرتتە دومبىراشى جىگىتتەر ونەرسۇيەر قاۋىمنىڭ نازارىنا حالىققا كەڭىنەن تانىمال كۇيلەردى، الەمدىك كومپوزيتورلاردىڭ شىعارمالارىن جانە وزدەرىنىڭ اۆتورلىق مۋزىكالارى بار تاماشا شوۋ-باعدارلامالارىن ۇسىنادى.
قازاقتىڭ قاسيەتتى دومبىراسىن ەلىمىزدە عانا ەمەس، الىس-جاقىن شەت ەلدەردە دە تانىتىپ جۇرگەن Temirlan & Yernat دۋەتى العاشىندا «باستاۋ» دەگەن اتپەن شىققان. كەيىننەن توپتارىن ءوز ەسىمدەرىمەن اتاعاندى ءجون كورگەن. بيىل توپتىڭ قۇرىلعانىنا 7 جىل تولىپ وتىر. وسى ۋاقىت ارالىعىندا ولار قاسيەتتى اسپاپتى الەمنىڭ بىرنەشە مەملەكەتىندە تانىتىپ قانا قويماي، جۇلدەلەرمەن ورالىپ جۇرگەنى دە بار. ماسەلەن، 2018 جىلى اقش-تا ارنولد شۆارسەنەگگەر پروديۋسەر بولعان World Championships ۇلكەن كونكۋرسىندا التىن مەدال جەڭىپ السا، كەيىن لوندونداعى Golden Time Talent، يسپانيادا وتكەن Music Box International، تۇركياداعى «Bridge TV Need for Fest» جانە Music World حالىقارالىق مۋزىكالىق كونكۋرستارىندا لاۋرەات اتانعان.
استانا قالاسىنداعى قازاق ۇلتتىق ونەر ۋنيۆەرسيتەتىندە 2-كۋرس وقىپ جۇرگەندە ديماش قۇدايبەرگەنمەن بىرگە ونەر كورسەتەتىن انسامبل قۇرامىنا قوسىلىپ، «I am a Singer» بايقاۋىندا «دايديداۋ» ءانىن دومبىرامەن سۇيەمەلدەگەن. دۋبايداعى بۇكىلالەمدىك EXPO كورمەسىندە ەل اتىنان ونەر كورسەتتى. توكيو وليمپياداسىندا قازاقستان مادەنيەتىنىڭ امباسسادورى بولدى. بۇگىندە Air Astana ۇشاقتارىنىڭ رەسمي بورت مۋزىكاسى مەن استانا قالاسىنىڭ تەمىرجول ۆوكزالدارىندا، ءىرى ساۋدا ورتالىقتارىندا Temirlan & Yernat دۋەتىنىڭ ورىنداۋىنداعى شىعارمالار ءجيى قويىلادى.
اتادان قالعان اسىل مۇرانى قاستەرلەپ، ءداستۇرىن دارىپتەپ جۇرگەن شىعارماشىل جاستار عالامتوردا دا كەڭىنەن تانىمال. ولاردىڭ REELS-تەرى شاعىن كينو ىسپەتتى. قازاقتىڭ بايتاق دالاسى مەن شەكسىز جازيرالى ولكەسىن كورسەتە وتىرىپ ورىنداعان اۋەندەرى بەينەباياندارىن اسەرلى ەتە تۇسەدى.
كەيىنگى جىلدارى شەتەلدىك كومپوزيتورلاردىڭ شىعارمالارىن دومبىرادا ويناۋ سانگە اينالدى. بۇل باعىتتا Temirlan & Yernat دۋەتى دە ەرەكشە كوزگە تۇسەدى. مۋزىكاداعى جەتى نوتا – دومبىرانىڭ پەرنەسىنە ساي كەلەدى، سول سەبەپتى قوس ىشەكتى اسپاپ كەز كەلگەن شەتەلدىك مۋزىكانى ورىنداۋعا قاۋقارلى ەكەنىن دۋەتتىڭ ونەرىنەن اڭعارۋعا بولادى.
ءداستۇرلى پوپ-مۋزىكا ستيلىندە ونەر كورسەتەتىن جىگىتتەر وزدەرىنىڭ اۆتورلىق شىعارمالارىن دا جازادى. بۇگىندە ولار ەتنودەكوستيل جانە ەتنومودەرن باعىتىنداعى اۋەندەردى كوپشىلىككە ۇسىنادى.
بۇگىندە دومبىراشى جىگىتتەردىڭ ونەرىن تاماشالاۋ حالىق اراسىندا كادىمگى ترەندكە اينالعان. تابيعاتىن وزگەرتپەي، ءدامىن بۇزباي ورىندايتىن اۋەندەرىن الەۋمەتتىك جەلى قولدانۋشىلارى پاراقشالارىندا ءجيى پايدالانادى.
«ءبىزدى تانىمال ەتكەن – قولىمىزداعى دومبىرا! ماقساتىمىز – ءداستۇرلى اۋەندەردى ۇلتتىق بولمىسىمىزدى ساقتاي وتىرىپ الەمگە تانىتۋ، ناسيحاتتاۋ»، – دەيدى ونەرپازدار.
ءيا، دومبىرانىڭ ءۇنى جانىڭدى تەربەتەدى، كوڭىل كۇيىڭدى كوتەرەدى. ەڭ كەرەمەتى، كەۋدەڭدە اسقاق كۇش-جىگەر، ومىرگە دەگەن قۇشتارلىق، تۋعان ەلىڭە، جەرىڭە، ۇلتىڭا دەگەن شەكسىز ماحاببات سەزىمىن سىيلايدى.
ەندەشە، بابالاردىڭ سىرلى جۇرەگىنەن تۋعان ءداستۇرلى اۋەندەر قازاق دەگەن ۇلت باردا، وسىنداي تالانتتى ۇلدار باردا ماڭگى جاساي بەرمەك. قوس ىشەكتىڭ ۇنىنە ەلىتىپ، قازاقتىڭ رۋحىمەن سىرلاسقىڭىز كەلسە، Temirlan & Yernat دۋەتىنىڭ كونسەرتىنە كەلىڭىز، قۇرمەتتى وقىرمان!
«اقشامنىڭ» انىقتاماسى:
تەمىرلان ولجاباي مەن ەرنات ناۋرىز – استانا قالاسىنداعى قازاق ۇلتتىق ونەر ۋنيۆەرسيتەتىنىڭ تۇلەكتەرى. دۋەت ۋنيۆەرسيتەت قابىرعاسىندا قۇرىلعان. العاشىندا «باستاۋ» دەگەن اتپەن شىعىپ، كەيىننەن Temirlan & Yernat دەگەن اتاۋدى تاڭداعان. قازىرگى تاڭدا استانا قالاسىنداعى روزا باعلانوۆا اتىنداعى «قازاقكونسەرتتە» قىزمەت اتقارادى. ەكى ونەرپازدىڭ دا وتباسى بار.