دومبىرا — مادەنيەتىمىزدىڭ نەگىزگى سيمۆولدارىنىڭ ءبىرى
ەلىمىزدىڭ جەتى مىڭ ءبىلىم بەرۋ ۇيىمىندا ءبىر مەزگىلدە «بالبىراۋىن»، «اداي» جانە «سارىارقا» كۇيلەرى ورىندالدى، دەپ حابارلايدى Almaty-akshamy.kz.
ءمينيستردىڭ ايتۋىنشا، مۋزىكا، اسىرەسە دومبىرانىڭ اۋەزدى ءۇنى بارلىق ۇلتتاردى جالپىادامي قۇندىلىقتار - تولەرانتتىلىق، توزىمدىلىك، بىرلىككە ۇندەپ، ءبىر ارناعا توعىستىرادى. جانە وسكەلەڭ ۇرپاقتىڭ ءوز تاريحى مەن ونەرىن ۇيرەنۋگە دەگەن ۇمتىلىسى مەن قىزىعۋشىلىعىن وياتادى.
«دومبىرا — مادەنيەتىمىزدىڭ نەگىزگى سيمۆولدارىنىڭ ءبىرى، ۇلتتىق قۇندىلىعىمىز. ءبىزدىڭ وقۋشىلارىمىز، بالاباقشانىڭ كىشكەنتاي تاربيەلەنۋشىلەرى، كوللەدج ستۋدەنتتەرى ۇلتتىق اسپاپتا ويناۋعا بەلسەندىلىك تانىتقانى قۋانتادى. بۇگىن دومبىرانىڭ شاناعىنان توگىلگەن ءۇن ەلىمىزدىڭ ءار وڭىرىندە اۋەلەدى. وقۋشىلار ۇرپاقتان-ۇرپاققا جالعاسىپ كەلە جاتقان مادەني مۇرانى ساقتاپ، ودان ءارى جالعاستىرادى دەپ سەنەمىن»،— دەدى عاني بەيسەمبايەۆ.
چەللەندج سوڭىندا وقۋ-اعارتۋ ءمينيسترى ەلورداداعى د. قونايەۆ اتىنداعى № 66 مەكتەپ-ليسەيىنىڭ وقۋشىلارىمەن بىرگە كۇي ورىندادى. «ناۋرىز مەيرامى» مەرەكەلىك ەستافەتاسىنا ميلليونعا جۋىق قازاقستاندىق وقۋشى قاتىستى. ەڭ كىشكەنتايى - باتىس قازاقستان وبلىسى تەرەكتى اۋدانى «اقبوتا» بالاباقشاسىنىڭ تاربيەلەنۋشىلەرى.
ەستەرىڭىزگە سالساق، بيىل «ناۋرىز مەيرامى» ەلىمىزدىڭ بارلىق مەكتەپتەرىندە 10-17 ناۋرىز ارالىعىندا وتەدى. بۇل كۇندەرى جالپى رەسپۋبليكالىق «تازا تابيعات» اكسياسى، «جاسىل ءۇي» چەللەندجى، «قايىرىمدى ۇلت»، «قولونەرشىلەر جارمەڭكەسى» قايىرىمدىلىق شاراسى، ۇلتتىق تاعامدار فەستيۆالى مەن ۇلتتىق ويىندار مەرەكەسى بولادى.
«ناۋرىز – ۇلىستىڭ ۇلى كۇنى» سۋرەتتەر بايقاۋى، «وتباسى – باقىت مەكەنى» اتتى وتباسىلىق جارىس ۇيىمداستىرىلىپ، الەۋمەتتىك جەلىلەردە #ناۋرىزمەيرامى #ناۋرىزكۇيى حەشتەگىمەن فلەشموب، چەللەندجدەر جۇرگىزىلەدى.