الماتىدا «ALMA CUP 2023» چەمپيوناتى باستالادى

ALMA CUP – ءارتۇرلى سپورت تۇرلەرىنەن ستۋدەنتتىك كوماندالار قاتىساتىن جاستار اراسىنداعى سپورت چەمپيوناتى

الماتىدا «ALMA CUP 2023» ستۋدەنتتىك سپورت چەمپيوناتىنىڭ جارىستارى وتەدى، دەپ حابارلايدى Almaty-akshamy.kz BAQ.KZ-كە سىلتەمە جاساپ.

«Social Project Management» ورتالىعى» قوعامدىق قورىنىڭ ۇيىمداستىرۋمەن وسى ايدىڭ سوڭىنان باستاپ «ALMA CUP 2023» ستۋدەنتتىك سپورت چەمپيوناتى باستالادى.

ALMA CUP – ءارتۇرلى سپورت تۇرلەرىنەن ستۋدەنتتىك كوماندالار قاتىساتىن جاستار اراسىنداعى سپورت چەمپيوناتى. بۇل ءتۋرنيردىڭ ماقساتى – جاستار اراسىندا سالاۋاتتى ءومىر سالتىن ناسيحاتتاپ، ولاردىڭ بويىندا ازاماتتىق جانە پاتريوتتىق سەزىمدەرىن وياتۋ، دۇرىس ومىرلىك ۇستانىمدار قالىپتاستىرۋ جانە جاس سپورتشىلاردى ىنتالاندىرۋ.

چەمپيونات اياسىندا فۋتبول ليگاسىنىڭ، باسكەتبول ليگاسىنىڭ، ۆولەيبول ليگاسىنىڭ جانە كيبەرسپورت ليگاسىنىڭ جارىستارىن وتكىزۋ جوسپارلانعان. ءار تۋرنير بويىنشا جۇلدە قورى 1 200 000 تەڭگەنى قۇرايدى. سونىمەن قاتار «ALMA CUP» فۋتبول ليگاسىنىڭ جەڭىمپازدارىنا ستۋدەنتتەر اراسىنداعى فۋتبولدان رەسپۋبليكالىق ليگاعا قاتىسۋ مۇمكىندىگىن بەرىلەدى.

ايتا كەتكەن ءجون، تۋرنيرگە الماتى قالاسىنىڭ بارلىق جوعارى وقۋ ورىندارىنىڭ ستۋدەنتتەرى قاتىسا الادى.

ستۋدەنتتىك فۋتبول ليگاسى 25.03.2023 - 01.05.2023 ارالىعىندا وتەدى.

باسكەتبول ليگاسىنىڭ، ۆولەيبول ليگاسىنىڭ جانە كيبەرسپورت ليگاسىنىڭ جارىستارى 01.09.2023 - 20.11.2023 ارالىعىندا بولادى.