ەكپە شۇعىل جاعدايعا دايىن.
ءۇندىستاننىڭ دارى-دارمەكتەر جونىندەگى (DCGI) باس باقىلاۋشىسى جۇما كۇنى كوروناۆيرۋسقا قارسى ZyCoV-D Zydus Cadila ۆاكسيناسىن شۇعىل قولدانۋعا رۇقساتىن بەردى، دەپ حابارلايدى Almaty-akshamy.kz. قازاقپارات سايتىنا سىلتەمە جاساپ.
ءۇندىستاننىڭ عىلىم جانە تەحنولوگيالار مينيسترلىگىنىڭ مالىمدەۋىنشە، دنق نەگىزىندە جاسالعان الەمدەگى العاشقى كوروناۆيرۋس ۆاكسيناسىن ەرەسەكتەرگە جانە 12 جاستان اسقان بالالارعا سالۋعا بولادى، دەپ حابارلايدى قازاقپارات India TV News Desk-قا سىلتەمە جاساپ. 28 مىڭ ەرىكتى قاتىسقان ءىىى كلينيكالىق سىناقتىڭ ارالىق قورىتىندىسى پتر-دىڭ وڭ ناتيجەسى بار جاعدايدا باستاپقى تيىمدىلىگى 66،6%-عا جەتكەنىن كورسەتتى.
قازىرگى كەزدە بۇل - ءۇندىستاندا COVID-19 ۆيرۋسىنا قارسى ۆاكسينانىڭ ەڭ ۇلكەن سىناعى. بۇل ۆاكسينا بۇرىن وتكىزىلگەن ءى/ءىى سىناق كەزىندە ءوزىنىڭ يممۋنوگەندىگىن، توزىمدىلىگى جانە قاۋىپسىزدىگى تۇراقتى ەكەنىن كورسەتتى. ءى/ءىى جانە ءىىى كلينيكالىق سىناقتى مالىمەتتەر قاۋىپسىزدىگىنە مونيتورينگ جاساۋ تاۋەلسىز كەڭەسى (DSMB) قاداعالاعان. 1 شىلدەدە شتاب پاتەرى احمەدابادتا ورنالاسقان ءىرى DCGI فارماسيەۆتيكا كومپانياسى ۆاكسينانى شۇعىل پايدالانۋعا رۇقسات الۋ ءۇشىن ءوتىنىم جىبەرگەن. كومپانيا ۆاكسينانى قازىرگى كەزدە ءۇندىستاننىڭ 50-دەن استام ورتالىعىندا ءىرى كلينيكالىق سىناقتان وتكىزگەنىن مالىمدەدى. ەندى ZyCoV-D – ەلدە قولدانۋعا رۇقسات ەتىلگەن التىنشى ۆاكسينا. ءۇندىستاندا Serum Instituteء-تىڭ Covishield، Bharat Biotechء-تىڭ Covaxin، رەسەيلىك Sputnik V، امەريكاندىق Moderna جانە Johnson and Johnson ۆاكسينالارى قولدانىلىپ كەلەدى.
پلازميدا دنق نەگىزىندە ازىرلەنگەن ZyCoV-D ۆاكسيناسىن تەرى استىنا ينەسىز ينەكتوردىڭ كومەگىمەن سالعان ءجون. Zydus Group ءتوراعاسى پانكادج ر. پاتەل (Pankaj R Patel) ولاردىڭ «ءقاۋىپسىز، توزىمدىلىگى جاقسى ءارى ءتيىمدى ۆاكسينانى» شىعارا العانىنا ءدان ريزاشىلىعىن ءبىلدىردى.
«وسىنداي شەشۋشى كەزەڭدە جانە، بارلىق پروبلەماعا قاراماستان، الەمدە كوروناۆيرۋسقا قارسى العاشقى دنك-ۆاكسيناسىن شىعارۋ – ءۇندىستان زەرتتەۋشى عالىمدارىنىڭ ەڭبەگى جانە ولاردىڭ جاڭاشىلدىق رۋحى»، - دەدى ول.