رەسەيلىك جەڭىلمەگەن بوكسشىلار، جارتىلاي اۋىر سالماقتاعى الەم چەمپيوندارى دميتريي بيۆول مەن ارتۋر بەتەربييەۆ لوندوندا باسپا ءسوز كونفەرەنسياسىن وتكىزدى. بۇل باسپا ءسوز ءماسليحاتى 12 قازاندا ساۋد ارابياسىنىڭ ەر-رياد قالاسىندا وتەتىن ءابسوليۋتتى چەمپيون اتاعى ءۇشىن جەكپە-جەككە ارنالعان، دەپ حابارلايدى aqshamnews.kz.
بۇل جەكپە-جەك ءۇشىن ەكىنشى باسپا ءسوز كونفەرەنسياسى بولدى، سەبەبى ارتۋر بەتەربييەۆتىڭ جاراقاتىنا بايلانىستى كەزدەسۋ ماۋسىمنان قازان ايىنا اۋىستىرىلعان ەدى. ادەتتەگىدەي، باسپا ءسوز كونفەرەنسياسىندا ەكى بوكسشى بىر-بىرىنە كوز اتىستىرۋ «كوزقاراس دۋەلى» دە ءوتتى، ونى كوپتەگەن جانكۇيەرلەر تاماشالادى.
ەرەكشە اتاپ وتەتىن جايت، ەكى چەمپيون بىر-بىرىنە قارسى ءسوز ايتىپ، ارتىق ارەكەتكە بارمادى. كەرىسىنشە، ولار الداعى جەكپە-جەكتىڭ ماڭىزدىلىعىنا باسا نازار اۋدارىپ، قارسىلاستارىنا قۇرمەتپەن قارادى.
"كاسىبي بوكسقا كەلگەن كەزىمدە الدىما ءبىر عانا ماقسات قويدىم – ءوز سالماعىمدا ۇزدىك بولۋ. بۇل جەكپە-جەك – سول ماقساتقا جەتۋدەگى سوڭعى قادام. مەن التى جاسىمنان بەرى رينگتەمىن، بارلىق كۇش-جىگەرىمدى، ۋاقىتىمدى وسى ارمانىم ءۇشىن ارنادىم. بۇل جەكپە-جەك – بارلىق ەڭبەگىمنىڭ دۇرىس نەمەسە دۇرىس ەمەستىگىن كورسەتەتىن سوڭعى سىناق. وسى جەكپە-جەكتە بارىمدى سالىپ، ءوزىمنىڭ تاريحىمدا دۇرىس قادامدار جاساعانىمدى دالەلدەيمىن. ارتۋرعا جەكپە-جەك ءۇشىن العىس ايتامىن"، -دەدى دميتريي بيۆول.
39 جاستاعى WBC، IBF جانە WBO تۇجىرىمدارى بويىنشا چەمپيون ارتۋر بەتەربييەۆ ءارقاشان نەمقۇرايلى جاۋاپ بەرۋمەن تانىلعان. بۇل جولى دا ول قىسقا، ءبىراق سالماقتى پىكىر ءبىلدىردى.
"بۇل جەكپە-جەكتى ۇيىمداستىرعاندارعا، ءوز كومانداما، قارسىلاسىما جانە ونىڭ كومانداسىنا، سونداي-اق پروموۋتەرلەرگە العىس بىلدىرەمىن. ءتورت بەلبەۋ ءۇشىن جەكپە-جەك – كاسىبي بوكستىڭ شىڭى. ءقازىر مەندە ءۇش بەلبەۋ بار، ەندى ءتورتىنشى بەلبەۋدى دە وزىمە قوسقىم كەلەدى. ءار قارسىلاس ەرەكشە، ءبىراق ءبىز بۇل جەكپە-جەككە ءارتۇرلى سەنارييلەر ازىرلەدىك. ءبىز كەز كەلگەن جاعدايعا دايىنبىز"،-دەدى ارتۋر بەتەربييەۆ.
قىزىقتى دەرەكتەر:
• دميتريي بيۆول مەن ارتۋر بەتەربييەۆ ەكەۋى دە كاسىبي رينگتە جەڭىلمەگەن.
• بۇل جەكپە-جەك جەڭىمپازى جارتىلاي اۋىر سالماقتاعى بارلىق ءتورت نەگىزگى بەلبەۋدى بىردەن يەلەنىپ، ءابسوليۋتتى چەمپيون اتاعىن الادى.
• بيۆول مەن بەتەربييەۆ الەمدەگى ەڭ ۇزدىك 10 بوكسشىنىڭ قاتارىنا كىرەدى، ولاردىڭ جەكپە-جەگى كاسىبي بوكستىڭ شىڭىنداعى ساتتەردىڭ ءبىرى بولماق.
ەكى چەمپيوننىڭ اراسىندا وتەتىن بۇل تاريحي جەكپە-جەك بوكستىڭ تاريحىنا التىن ارىپتەرمەن جازىلاتىنى ءسوزسىز.