«امازون» كومپانياسىنىڭ نەگىزىن قالاۋشى ميللياردەر دجەف بەزوس افريكاداعى تابيعاتتى قالپىنا كەلتىرىپ، ازىق-تۇلىك جۇيەسىن جەتىلدىرۋگە 2 ميلليارد دوللار بولەدى. بۇل تۋرالى كاسىپكەر گلازگوداعى كونفەرەنسيادا جاريالادى - دەپ حابارلايدى almaty-akshamy.kz
قوماقتى قارجىنىڭ 1 ميللياردى قارا قۇرلىقتا تالدار ەگىپ، توزعان لاندشافتاردى قالپىنا كەلتىرۋگە بولىنبەك. قالعانى ەگىستىك شىعىمىن ارتتىراتىن شارۋاشىلىقتاردى كەڭەيتىپ، ونىمدەردى تۇراقتى جەتكىزۋ جۇيەسىن قۇرۋعا جۇمسالماق. بەزوس، سونداي-اق امازون 2040 جىلعا تامان كومىرقىشقىل گازىن شىعارۋدى تولىق توقتاتۋعا نيەتتى ەكەنىن اتاپ ءوتتى. ال 2025 جىلعا قاراي بىرلەستىك بارلىق وپەراسياسىن جاڭعىرتىلاتىن قۋات كوزدەرىن پايدالانۋ ارقىلى جۇزەگە اسىرۋعا كوشپەك.
– بەزوستىڭ جەر قورى كەلەسى جىلى وتەتىن كەزەكتى كونفەرەنسياعا دەيىن افريكاداعى تابيعاتتى قالپىنا كەلتىرۋگە باعىتتالعان ستراتەگيانى جاساۋعا دايىن بولادى. ءبىراق ءبىز كليماتتىق داعدارىستى شەشۋ ءۇشىن تەك ءار ەلدەگى ۇكىمەت مەن ۇيىمدارعا نەمەسە قايىرىمدىلىق قورلارىنا عانا سۇيەنە المايمىز. كومىرقىشقىل گازىن قىسقارتۋ ىسىنە جەكەمەنشىك سەكتور دا بەلسەنە اتسالىسۋى ءتيىس - دەدى Amazon كومپانياسىنىڭ نەگىزىن قالاۋشى دجەفف بەزوس.
روكفەللەر اۋلەتى مەن بەزوس قورى جانە يكەا كومپانياسى عالامشار ءۇشىن الەمدىك ەنەرگەتيكالىق اليانس قۇراتىنىن جاريالادى. ونىڭ ماقساتى ءتۇرلى ۇيىمداردىڭ قايىرىمدىلىق قارجىسىن جيناپ، كەدەي ەلدەردىڭ بالامالى ەنەرگيا كوزدەرىنە ءوتۋىن قارجىلاندىرۋ. اليانس الداعى 5 جىلدا بۇل جوباعا 50 ميلليارد دوللار ءبولىپ، ال 10 جىلدا ونىڭ كولەمىن 100 ميلليارد دوللارعا دەيىن جەتكىزۋدى كوزدەپ وتىر.