استانا ماڭىندا ستراتەگيالىق نىساندى قورعاۋعا ارنالعان ارنايى تاكتيكالىق وقۋ-جاتتىعۋلار ءوتتى.
قورعانىس ۆەدومستۆوسىنىڭ جوسپارىنا سايكەس، 99255 اسكەري ءبولىمىنىڭ اۋماعىندا وتكەن جاتتىعۋلارعا 70 اسكەري مىندەتتى قاتىستى. اۋماقتىق قورعانىس قۇراماسى اسكەري قىزمەتشىلەرىنىڭ نەگىزگى مىندەتى ديۆەرسانتتاردىڭ ستراتەگيالىق وبەكتىنىڭ اۋماعىنا كىرۋىنە جول بەرمەۋ بولدى.
جيىنعا ەلوردادان شاقىرىلعان اسكەري مىندەتتىلەرگە دالالىق وقىتۋ مەن ۇيلەسىمدىلىكتىڭ تەوريالىق جانە پراكتيكالىق كۋرسى، ونىڭ ىشىندە اتىس دايىندىعى جاتتىعۋلارى وتكىزىلدى. مۇنداي وقۋ-جاتتىعۋلار جىلىنا ەكى رەت – كۇز بەن كوكتەمدە ءوتىپ تۇرادى.
– بۇل جەردە وقۋ-جاتتىعۋدىڭ بەلسەندى كەزەڭى ءوتتى، – دەيدى استانا اكىمىنىڭ اسكەري قاۋىپسىزدىك جانە قورعانىس ماسەلەلەرى جونىندەگى كومەكشىسى پودپولكوۆنيك مەيرام ەلشىبايەۆ. – سەنارييگە سايكەس، تەرروريستەر توبى اۋماقتىق قورعانىس باتالونى كۇزەتەتىن ستراتەگيالىق نىساندى باسىپ الۋعا ارەكەت ەتەدى. ءىس-شارا توتەنشە جاعدايلار جانە ىشكى ىستەر مينيسترلىكتەرىنىڭ بولىمشەلەرىن تارتا وتىرىپ، قالا اكىمدىگىنىڭ قولداۋىمەن وتكىزىلدى.
اسكەري مىندەتتى سەرجانت مارات ورالبەكوۆ جيىندى روتا سەرجانتى لاۋازىمىندا وتۋدە. جەكە قۇرام 10 كۇن بويى وقۋ-تاكتيكالىق دايىندىقپەن اينالىسىپ، اتىس الاڭىنا شىقتى.
– مۇناي بازاسىن كۇزەتۋ كەزىندە ديۆەرسانتتاردى تويتارۋداعى تاكتيكالىق دايىندىق ءساتتى ءوتتى، – دەيدى ول.
اقتوبە وبلىسىندا «بوگەت-2023» جاتتىعۋى اياقتالدى. مۇندا اۋماقتىق قورعانىس قۇراماسى كۇزەت روتاسىنىڭ بوگەتتى زاڭسىز قارۋلى توپتاردىڭ ىقتيمال ديۆەرسيالارىنان قورعاۋعا دايىندىعى تەكسەرىلدى.
«بوگەت-2023» تاكتيكالىق-ارنايى جاتتىعۋلارىنىڭ قورىتىندى كەزەڭىن وتكىزۋ ءۇشىن اقتوبە سۋ قويماسى تاڭداپ الىندى. وعان اقتوبە قالاسىنان 78 اسكەري مىندەتتى قاتىستى.
جۇرگىزىلگەن مانيەۆرلەردىڭ نەگىزگى تاقىرىبى «اۋماقتىق قورعانىس قۇراماسى كۇزەت روتاسىنىڭ بولىنگەن كۇشتەرمەن جانە قۇرالدارمەن بىرلەسە وتىرىپ، زاڭسىز قارۋلى قۇرالىمدى جويۋدا ارنايى اسكەري ءىس-قيمىلداردى جۇرگىزۋى» بولدى. جاتتىعۋ اياسىندا اسكەري قىزمەتشىلەر اتىس قارۋى مەن گراناتا اتقىشتاردى پايدالاندى.
ەلىمىزدىڭ ءبىرقاتار وڭىرىندە ءوتىپ جاتقان جاتتىعۋلاردىڭ ماڭىزدى قۇرامداس بولىگى ءارتۇرلى قۇرىلىمدارعا تيەسىلى كۇشتەر مەن قۇرالداردىڭ، ونىڭ ىشىندە اۋماقتىق اسكەرلەر قۇراماسىنىڭ، پوليسيا دەپارتامەنتىنىڭ، ۇلتتىق ۇلان مەن توتەنشە جاعدايلار دەپارتامەنتى بولىمشەلەرىنىڭ ءوزارا بەلسەندى ىس-ارەكەتى بولدى.