ق ر وقۋ-اعارتۋ مينيسترلىگىنىڭ ۇيىمداستىرۋىمەن نازاربايەۆ ۋنيۆەرسيتەتىنىڭ بازاسىندا استانا قالاسى، اقمولا، پاۆلودار، قوستاناي جانە سولتۇستىك قازاقستان وبلىستارى مەملەكەتتىك مەكتەپتەرى ديرەكتورلارىنىڭ قاتىسۋىمەن «زاماناۋي مەكتەپتى باسقارۋ: ترەندتەر جانە بولاشاق» تاقىرىبىنداعى فورۋمىندا ءبىلىم بەرۋ سالاسىنداعى وزەكتى ماسەلەلەر تالقىلاندى، دەپ حابارلادى اlmaty-akshamy.kz.
TEDx فورماتىنداعى ينتەراكتيۆتى سەسسياعا وقۋ-اعارتۋ ءمينيسترى عاني بەيسەمبايەۆ قاتىستى. ەلىمىزدىڭ باس ۇستازى وتاندىق ءبىلىم بەرۋ جۇيەسىن دامىتۋدىڭ ماڭىزدى اسپەكتىلەرىنە توقتالىپ، كادرلىق الەۋەتتى ارتتىرۋعا ەرەكشە كوڭىل بولىنەتىنىن اتاپ ءوتتى.
«مەملەكەت باسشىسىنىڭ قولداۋىمەن ءتورت جىل ىشىندە پەداگوگتەردىڭ جالاقىسى 100%-عا، ياعني ەكى ەسە ءوستى. 2023 جىلدىڭ قىركۇيەگىندە مەكتەپكە دەيىنگى ۇيىمدارداعى پەداگوگتەردىڭ جالاقىسى 30%-عا ءوستى. بۇل باعىتتاعى جۇمىستار، ياعني پەداگوگتەردى قولداۋ شارالارى جالعاسادى. وسى جىلدان باستاپ ءبىلىم بەرۋ قىزمەتكەرلەرىن كوتەرمەلەۋ جۇيەسى، سونداي-اق ءبىلىم بەرۋ ۇيىمدارى باسشىلارى مەن ولاردىڭ ورىنباسارلارىنىڭ جالاقىسى قايتا قارالاتىن بولادى»، - دەدى عاني بەيسەمبايەۆ.
ۆەدومستۆو باسشىسىنىڭ ايتۋىنشا، بۇگىندە مينيسترلىك ۇلتتىق ءبىلىم بەرۋ دەرەكتەر بازاسىن جەتىلدىرۋ باعىتىندا جۇمىس جۇرگىزۋدە. وندا ءبىلىم بەرۋ ۇيىمى تۋرالى مالىمەتتەر، پەداگوگتىڭ جەكە دەرەكتەرى، ءبىلىم الۋشىلاردىڭ ۇلگەرىمى مەن ءبىلىم ساپاسى جانە ت.ب. كورسەتىلەدى.
كەزدەسۋگە استانا قالاسى مەن قازاقستاننىڭ ءتورت سولتۇستىك وبلىسىنداعى ورتا ءبىلىم بەرۋ ۇيىمدارىنىڭ ءبىر جارىم مىڭعا جۋىق باسشىسى قاتىستى. ولار ءۇشىن ديالوگ الاڭى اشىلدى. وندا جيىنعا قاتىسۋشىلارعا ءبىلىم بەرۋ سالاسىنداعى باقىلاۋ جانە مونيتورينگ ءىس-شارالارىنىڭ قورىتىندىلارى جانە بيىلعى جىلعا ارنالعان جوسپارلار تۋرالى ايتىلدى. اتاپ ايتقاندا: ءبىلىم بەرۋ ساپاسىن ارتتىرۋ، ينكليۋزيۆتى جانە ارنايى ءبىلىم بەرۋدى دامىتۋ، سيفرلاندىرۋ، بالالاردىڭ قاۋىپسىزدىگىن قامتاماسىز ەتۋ جانە باسقالار.
ەستەرىڭىزگە سالا كەتەيىك، بۇعان دەيىن مينيستر الماتى قالاسى، تۇركىستان، جەتىسۋ جانە الماتى وبلىستارى مەكتەپتەرىنىڭ ديرەكتورلارىمەن كەزدەسۋلەر وتكىزگەن بولاتىن. فورۋم ەلىمىزدىڭ باسقا وڭىرلەرىندە دە جالعاسادى.