قازاق ۇلتىنىڭ كوشباسشىلارىنىڭ ءبىرى، قازاقستان كومپارتياسى ورتالىق كوميتەتىنىڭ ءبىرىنشى حاتشىسى – دىنمۇحامەد قونايەۆتىڭ جەكە قۇجاتتارى مەملەكەتتىك ساقتاۋعا بەرىلدى.
دىنمۇحامەد احمەت ۇلىنىڭ جەكە ءارحيۆى قازاقستان رەسپۋبليكاسى پرەزيدەنتىنىڭ ارحيۆىنە تاپسىرىلدى. تاريحي قۇجاتتار قونايەۆتىڭ مۇراگەرى، «اۋەزوۆ ءۇيى» عىلىمي-مادەني ورتالىعىنىڭ جەتەكشىسى ديار اسقار ۇلى قونايەۆ (اسقار احمەت ۇلى قونايەۆتىڭ بالاسى) تاپسىردى.
«ءبىزدىڭ ارحيۆتە دىنمۇحامەد احمەت ۇلىنىڭ قىزمەت كەزىندەگى قۇجاتتارى ساقتاۋدا. مۇراعاتتا ونىڭ قازاقستان كومپارتياسىنىڭ ورتالىق كوميتەتىن باسقارعان كەزەڭدە قول قويعان قۇجاتتارى، ىسكەرلىك حات-حابارلارى، باياندامالار جانە جازبالارى بار. دىنمۇحامەد احمەت ۇلى قونايەۆ مۇراسى پرەزيدەنت ءارحيۆىنىڭ ماقتانىشىنا اينالارىنا سەنىمدىمىن»، – دەدى ق ر پرەزيدەنتى ءارحيۆىنىڭ ديرەكتورى ءاليا مۇستافينا.
ايتا كەتكەن ءجون، ارحيۆكە بەرىلگەن قۇجاتتار نەگىزىندە ق ر پرەزيدەنتى ارحيۆىندە دىنمۇحامەد احمەت ۇلى قونايەۆتىڭ جەكە تەكتىك قورى جاسالادى، بۇل قايراتكەردىڭ ءومىربايانىن تولىق زەردەلەۋگە مۇمكىندىك بەرەدى ءارى سول ارقىلى قازاقستاننىڭ تاريحىنا جاڭا دەرەكتەر مەن دايەكتەر تولىقتىرىلاتىندىعىن بىلدىرەدى.
«بۇل قۇجاتتار مۇراعاتقا تاپسىرىلعاننان كەيىن نە كۇتىلەدى؟ ءبىز عىلىمي ساراپتاما جاساپ، قۇجاتتارعا وڭدەۋ جۇرگىزەمىز، سونداي-اق كەڭەيتىلگەن عىلىمي-انىقتامالىق اپپارات كومەگىمەن ەگجەي-تەگجەيلى تىزىمدەمەلەر جاسايمىز. بارلىق قۇجاتتارعا سيپاتتاما بەرىلىپ، ولار مەملەكەتتىك ەسەپكە الىنادى، ءار بەت نومىرلەنەدى»، – دەدى ءاليا مۇستافينا.