تانىمال ازىلكەش جانە اسابا عالىمجان قۇرمانبەكتىڭ ايتقان پىكىرى قوعامدا ۇلكەن داۋ تۋعىزدى.
ونەر يەسى «كەشەگى قاراساي باتىر، قابانباي باتىر، بوگەنباي باتىرلار جەر ءۇشىن ەمەس، يسلام ءدىنى ءۇشىن سوعىستى» دەپ ايتقان ءسوزى كوپشىلىكتىڭ نازارىن اۋداردى. ول بۇل ءسوزدى يسلامتانۋشى عالىمدار، يمامدار، ءدىن قىزمەتكەرلەرى جينالعان ۇلكەن كەشتە ايتقان بولاتىن.
«... وتاندى ءسۇيۋ – يماننان. كەشەگى قابانباي، بوگەنباي، ماحامبەت، يساتاي، رايىمبەك پەن قاراسايلار جەر ءۇشىن سوعىسقان جوق، اعايىن. ولار يسلام ءۇشىن سوعىستى. اتا ءدىنىمىز ءۇشىن سوعىستى. ويتكەنى يمانسىز ۇرپاققا جەردىڭ قاجەتى جوق ەدى. مىنا جەرگە يە بولاتىن يماندى ۇرپاقتىڭ ءدىنى ءۇشىن سوعىستى. اللا جولىندا سوعىستى. ەندى وسى زاماننىڭ باتىرلارى سىزدەرسىزدەر. سول سوعىستى جالعاستىرىپ كەلە جاتقان سىزدەرسىزدەر، يگى جاقسىلار»، - دەدى ول جينالعان قاۋىمعا.
عالىمجان قۇرمانبەكتىڭ پىكىرى قوعامدا ۇلكەن رەزونانس تۋعىزدى. ءبىر توپ بەلسەندى ازاماتتارى «قازاق باتىرلارى ءدىن ءۇشىن سوعىستى» دەگەن عالىمجان قۇرمانبەكوۆتىڭ سوزىنە زاڭدىق تۇرعىدا باعا بەرۋدى سۇراپ رەسمي ورىندارعا حات جولدادى
بۇل جاعداي تاريحي جانە مادەني ماسەلەلەردىڭ قانشالىقتى ماڭىزدى ەكەنىن جانە ولاردى تالقىلاۋ كەزىندە اباي بولۋ كەرەكتىگىن كورسەتەدى.