الماتى پوليسياسى كونسەرت كەزىندە قوعامدىق ءتارتىپ پەن جول قاۋىپسىزدىگىن قامتاماسىز ەتۋگە ءپد-نىڭ قىزمەتتەرى مەن بولىمشەلەرىنىڭ 2،5 مىڭنان استام قىزمەتكەرىن جۇمىلدىرادى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«بۇل - تەك قازاقستان ءۇشىن عانا ەمەس، حالىقارالىق ارەناداعى ايتۋلى وقيعا. سوندىقتان ونى دۇربەلەڭسىز، بەيبەرەكەتسىز جانە ەشقانداي قۇقىق بۇزۋشىلىقتارسىز ءوز دەڭگەيىندە وتكىزۋ وتە ماڭىزدى. پوليسيا قىزمەتكەرلەرى كونسەرت وتەتىن ورىن مەن وعان جاقىن اۋماقتا قوعامدىق ءتارتىپتى قامتاماسىز ەتەدى. سونىمەن قاتار، اباي داڭعىلى مەن ساتبايەۆ كوشەسىنىڭ بويىنا كولىكتەردى قويۋعا تىيىم سالىنعانىن ەسكەرتەمىز. وسىعان بايلانىستى قوناقتاردى كولىكتەرىن الدىن الا تۇراققا قويۋعا، قوسالقى كوشەلەردى پايدالانۋعا جانە كەپتەلىستەردى بولدىرماۋ ءۇشىن ولاردىڭ باعىتىن الدىن الا رەتتەۋگە شاقىرامىز. كونسەرت كەزىندە ءوزىن-وزى ۇستاۋ مادەنيەتىنە، الكوگولدى ىشىمدىكتەردى پايدالانۋعا تىيىم سالۋعا ەرەكشە نازار اۋدارامىز. اعا بۋىن جانكۇيەرلەرى مەن بالالارى بار ايەلدەرگە قۇرمەت كورسەتۋگە شاقىرامىن»، – دەدى الماتى قالالىق پد باستىعى ارىستانعاني زاپپاروۆ.