ديماشتىڭ جەكە كونسەرتى وتەدى

ديماش قۇدايبەرگەن وسى اپتادا مالايزيادا العاشقى كونسەرتىن وتكىزەدى

24 ماۋسىمدا مالايزيا استاناسى كۋالا-لۋمپۋردا ديماش قۇدايبەرگەننىڭ العاشقى «Stranger» جەكە كونسەرتى وتەدى، دەپ حابارلايدى almaty-akshamy.kz dimashnews.com سايتىنا سىلتەمە جاساپ.

ۇلكەن شوۋ قارساڭىندا كونسەرتتى ۇيىمداستىرۋشىلار كونسەرتكە بيلەتتەرمەن جانە ءارتىستىڭ اتى جازىلعان ەكسكليۋزيۆتى ونىمدەرمەن ءتۇرلى ءىس-شارالار وتكىزدى. ۆوكاليستەر بايقاۋى قىزىققا تولى بولدى، باستى جۇلدە جەڭىمپازدار ءۇشىن كونسەرتتىڭ شىمىلدىعىن اشاتىن قوناق رەتىندە ونەر كورسەتۋ مۇمكىندىگى بولدى.

بايقاۋدا ديماشتىڭ رەپەرتۋارىنان «S.O.S»، «اداجيو»، «وپەرا-2» سياقتى تانىمال اندەر شىرقالادى. بايقاۋ جۇلدەگەرلەرى جاس مۋزىكانتتار Lim Yue Zhen جانە Aric Lau، ال جەڭىمپاز – «زناي» ءانىن ورىنداعان 16 جاستاعى ءانشى Eshan بولدى.

سونداي-اق، مالايزيانىڭ ەڭ تانىمال انشىلەرىنىڭ ءبىرى – داتو شري سيتي نۋرحاليزا كونسەرتتىڭ ارنايى قوناعى رەتىندە قاتىساتىنىن جاريالادى. سيتي نۋرحاليزا ديماشتىڭ ورىنداۋىن جوعارى باعالايدى. كونسەرتتە ارنايى قوناق بولۋ مۇمكىندىگى تۋرالى سۇراققا جاۋاپ بەرگەندە سيتي نۋرحاليزا ديماشتىڭ انشىلىك قابىلەتىنە، شىعارماشىلىعىنا ءتانتى بولعانىن ايتتى.

«ديماشتىڭ داۋىسى كەرەمەت، مەيلى ول جوعارى نوتادا بولسىن، تومەن نوتادا بولسىن، ەش قيىندىقسىز ەركىن اۋىسا الادى، وتە كەرەمەت ءان ايتادى»، – دەپ اتاپ ءوتتى داتو شري سيتي نۋرحاليز xuan.com.my باسىلىمىنا بەرگەن سۇحباتىندا.