الماتىدا ديماش قۇدايبەرگەننىڭ STRANGER اتتى جەكە كونسەرتى ءوتتى، دەپ حابارلايدى Almaty-akshamy.kz Inform.kz-كە سىلتەمە جاساپ.
بۇل - ديماشتىڭ الماتىدا وتكىزگەن العاشقى كونسەرتى.
«بۇل كونسەرتتى وسىنداعى اعايىنعا، جەرلەستەرىمە العاش بەرىپ وتىرمىن. ول ءتىپتى مەن ءۇشىن ەمتيحان دەسەم دە بولادى. سونىمەن قاتار سىزدەردىڭ كوڭىلدەرىڭىزدەن شىعىپ، باتالارىڭىزدى الۋ ءۇشىن العاش رەت وسىندا كەلىپ تۇرمىن. جالپى، مەن 15 جاسىمدا ءدال وسىنداي لىق تولى ستاديوندا حالىقپەن بىرگە ءان ورىنداسام دەپ ارماندايتىن ەدىم. سول ارمانىم سىزدەردىڭ ارقالارىڭىزدا ورىندالىپ جاتىر»، - دەدى ءانشى كونسەرت الدىندا.
كونسەرتتە ديماش قۇدايبەرگەن بۇرىننان ايتىپ جۇرگەن اندەرىمەن قاتار، جاڭا تۋىندىلارىن دا ورىندادى.
سونىمەن قاتار ديماش تۋعان ءىنىسى ءابىلمانسۇر قۇدايبەرگەننىڭ سوزىنە جازىلعان ءاندى ساحناعا الىپ شىقتى.
كونسەرتتە حالىقارالىق بيشىلەر ۇجىمى، قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەسترى مەن «سالتانات» مەملەكەتتىك بي ءانسامبلى ونەرلەرىن ورتاعا سالدى.
شوۋعا جينالعان حالىق ديماشتىڭ تانىمال اندەرىن بىرلەسە ورىندادى. كونسەرتتە سونداي-اق، قوبىز، دومبىرانىڭ تاريحىنان سىر شەرتەتىن بەينەروليكتەر كورسەتىلدى.
شوۋ بارىسىندا ديماشتى ءوزىنىڭ بەند-توبى سۇيەمەلدەدى.
جالپى، كونسەرت انشلاگپەن ءوتتى.