ديماش قۇدايبەرگەننىڭ «Zhalyn» اتتى جاڭا انىنە تۇسىرىلگەن بەينەبايان جاريالاندى، دەپ حابارلايدى Almaty-akshamy.kz Inform.kz-كە سىلتەمە جاساپ.
قازاق تىلىندەگى «Zhalyn» ءانىن قازاقستاندىق كومپوزيتور ەدىلجان عابباسوۆ ديماش قۇدايبەرگەنمەن بىرلەسىپ جازعان.
«Zhalyn-دى 2020 جىلى ديماشپەن كەزدەسكەن كەزدە جازدىم. ولەڭنىڭ اۋەنىن جازا وتىرىپ، ديماشقا ءاننىڭ ءۇزىندىسىن كورسەتتىم،كەيىن ول قايىرماسىن جازدى. وسىلايشا، بۇل كومپوزيسيا ءبىزدىڭ شىعارماشىلىق تاندەمىمىزدە دۇنيەگە كەلدى. مەنىڭ ويىمشا، بارلىق تىڭدارمانعا بۇل تۋىندى ۇنايدى. ال ءبىز ولارعا كوپتەگەن ساپالى تۋىندىنى بۇدان ءارى دە سىيلاي بەرەتىن بولامىز»، - دەدى ە.عابباسوۆ.
سونداي-اق ونىڭ ايتۋىنشا، بۇل انگە تۋعان جەر، قازاق ەلىنە قاتىستى لەپ قوسقىسى كەلگەن، ونىمەن ءبىر مەزگىلدە زاماناۋي ءۇن دە بولعانىن قالاعان.
«بالا كەزىمدە ستيۆي ۋاندەر، مايكل دجەكسون جانە باسقا دا ساپالى مۋزىكانى كوپ تىڭدادىم. كوبىنە بۇل مەنىڭ جەكە شىعارمالارىمدى جاساۋ كەزىندە شابىتتىڭ نەگىزگى كوزى بولىپ تابىلادى. Zhalyn ءانى ءۇش بولىكتەن تۇرادى جانە ەكىنشى بولىگى ماعان وتە ۇنايدى، ويتكەنى وندا قازاق رۋحى بار».
كومپوزيسيا ءماتىنىن EL ARNA تەلەارناسىنىڭ پروديۋسەرى، تالانتتى اقىن نۇرجان اسحات ۇلى جازعان. نۇرجان ءاننىڭ نەگىزگى تاقىرىبى ماحاببات ەكەنىن ايتتى. الايدا، ماحابباتتان باسقا، مىنەز بار.
اد ديماش «Zhalyn» ءانىنىڭ مازمۇنىن ءوزى تاڭداعان، ونىڭ قانداي بولۋ كەرەكتىگىن ءتۇسىندىردى. وسىلايشا، نۇرجان اۋەندى قايتا-قايتا تىڭداي وتىرىپ جانە ءاننىڭ نەگىزگى تاقىرىبىنا سۇيەنە وتىرىپ ءماتىندى جازعان.
اسەرلى كومپوزيسياعا بەينەباياندى قازاقستاندىق رەجيسسەر شىڭعىسحان تاجىكەيەۆ MOOD VIDEO جانرىندا ءتۇسىردى.