ديماش قۇدايبەرگەننىڭ لاتىن امەريكاسىندا تۇراتىن جانكۇيەرلەرى ارگەنتينادا ورمانداردى قالپىنا كەلتىرۋ بويىنشا جوبانى اياقتادى.
پاتاگونيا وڭىرىندە 1 مىڭ اعاش وتىرعىزۋ اكسياسىنا الەمنىڭ تۇكپىر-تۇكپىرىنەن فاناتتار اتسالىستى، دەپ حابارلايدى Almaty-akshamy.kz Dimashnews.com سايتىنا سىلتەمە جاساپ.
بيىلعى مامىر ايىندا Dimash Latin Dears فان-كلۋبى ارگەنتينانىڭ پاتاگونيا وڭىرىندەگى ورمانداردى قالپىنا كەلتىرۋ ءۇشىن قاراجات جيناۋدى ۇيىمداستىرعان بولاتىن. باستاپقىدا قازاقستاندىق ءارتىستىڭ جانكۇيەرلەرى 382 اعاش وتىرعىزدى. الايدا كەيىن ەكىنشى ناۋقاندى باستاپ، ماقساتتى 1 مىڭ اعاشقا دەيىن ۇلعايتتى.
وسىلايشا، پاتاگونيا ايماعىندا 2000 جىلعا دەيىن ءومىر سۇرە الاتىن وتە ادەمى ءارى ۇلكەن قىلقان جاپىراقتى چيلي اراۋكارياسىنىڭ 1 مىڭ كوشەتى وتىرعىزىلدى.
اكسيا ءساتتى اياقتالعان سوڭ ديماش قۇدايبەرگەننىڭ ەسىمىنە جازىلعان «ورمان ساقشىسى» سەرتيفيكاتى بەرىلدى.