ديماش قۇدايبەرگەن مەن ونىڭ جانكۇيەرلەرىنە ارنالعان راديوستانسيا انتاركتيدادا حابار تاراتا باستادى

ديماش قۇدايبەرگەنگە جانە جانە Dears-كە ارنالعان La Era Dimash راديوستانسياسى انتاركتيداعا جەتتى.

بۇل تۋرالى راديو جۇرگىزۋشىلەرىنە بەرگەن سۇحباتىندا «ەسپەرانزا» عىلىمي-زەرتتەۋ ستانسياسىنىڭ قىزمەتكەرلەرى ايتتى، دەپ حابارلايدى Almaty-akshamy.kz.

La Era Dimash-تىڭ جاساۋشىلارى ارگەنتينادا ءوز راديوسىن ەندى عانا ىسكە قوسقان كەزدە قازاقستاندىق ءارتىستىڭ داۋىسى جەر شارىنىڭ ءار تۇكپىرىندە ەستىلۋىن قالادى.

«راديوستانسيا العاش رەت ەفيرگە شىققاندا، ءبىز ءوزىمىزدى وتە باقىتتى سەزىندىك. كۇن سايىن La Era Dimash باعدارلاماسى كورسەتىلگەن ەلدەردىڭ ءتىزىمى كوبەيۋدە. ولاردىڭ اراسىندا بۇرىن ەستىمەگەندەرى دە بولدى. ەندى ەكى جىلدان كەيىن ءبىزدىڭ راديو 96 ەلدە حابار تاراتادى»، – دەدى راديوستانسيانىڭ باسشىسى پاولا پروفەتا.

2022 جىلدىڭ 11 قازانىندا «ەسپەرانزا» زەرتتەۋ ستانسياسىنان حابار تاراتاتىن LRA36 راديوسىنىڭ قىزمەتكەرلەرى (شامامەن انتاركتيكا تۇبەگىنىڭ قيىر سولتۇستىگىندە ورنالاسقان ارگەنتينالىق زەرتتەۋ ستانسياسى) La Era Dimash-قا قىزىقتى سۇحبات بەردى.

اڭگىمە بارىسىندا كلاۋديا البارراسين، ماريا ەۆگەنيا رودريگەس، رومينا زابالزا جانە ماريەلا چۋركينا الىس جانە سۋىق كونتينەنتتەگى وزدەرىنىڭ قيىن، ءبىراق وتە قىزىقتى جۇمىستارى تۋرالى ايتىپ، La Era Dimash حابار تاراتۋى انتاركتيداعا جەتكەنىن جانە قىزدار قازاقستاندىق ءارتىستىڭ اندەرىن تىڭداۋعا مۇمكىندىك العانىن راستادى.

«ديماشتىڭ داۋىسىن العاش ەستىگەندە، ءبىز شىنىمەن تاڭقالدىق. ونىڭ ادەمى اندەرى بار، وتە ۇلكەن تالانت!» – دەپ ءبولىستى ولار.