ول قوسسايىستىڭ قورىتىندىسى بويىنشا 277 كەلىنى باعىندىردى
قازاقستاندىق اۋىر اتلەت ايزادا ءمۇپتىلدا باحرەين ەلىنىڭ ماناما قالاسىندا ءوتىپ جاتقان ازيا چەمپيوناتىندا التىن مەدال الدى، دەپ حابارلايدى Almaty-akshamy.kz.
ايزادا ءمۇپتىلدا ايەلدەر اراسىندا 87 كەلى سالماقتا كۇش سىناستى. ول 120 كەلىنى جۇلقا، 157 كەلىنى سەرپە كوتەرىپ، قوسسايىستىڭ قورىتىندىسى بويىنشا 277 كەلىنى باعىندىردى. وسىلايشا ول ازيا چەمپيونى اتانىپ، قازاقستاننىڭ كوك بايراعىن جەلبىرەتتى.
ايتا كەتەيىك، ءدال وسى سالماقتا تاعى ءبىر قازاقستاندىق ليۋبوۆ كوۆالچۋك قولا مەدال يەلەنىپ وتىر.
بۇعان دەيىن ازيا چەمپيوناتىندا قازاقستاننىڭ نامىسىن قورعاعان زۋلفيا چينشانلو مەن اسىلجان بەكتاي التىن مەدال العان بولاتىن. ارلي چونتەي مەن اراي نۇرلىبەكوۆا كۇمىس، ايشا وماروۆا مەن ارتەم انتروپوۆ ءۇشىنشى ورىن يەلەندى.