قوناققا جاپونيانىڭ تانىمال ءانشىسى كودجي تاماكي شاقىرىلدى
11 قاراشا كۇنى «NHK Music Special» جاپوندىق تەلەباعدارلاماسىندا «Autumn Strong» («Don’t Go») ايگىلى كومپوزيسياسىنىڭ اۆتورى كودجي تاماكيگە ارنالعان شىعارىلىم ءوتتى. وعان قازاقتاندىق ءانشى ديماش قۇدايبەرگەن دە قاتىستى، دەپ حابارلايدى Almaty-akshamy.kz قازاقپاراتقا سىلتەمە جاساپ.
Dimashnews.com سايتىنىڭ مالىمەتىنشە «NHK Music Special» باعدارلاماسىنىڭ بۇل كۇنگى شىعارىلىمى راسىمەن دە ەرەكشە بولدى. سەبەبى قوناققا جاپونيانىڭ تانىمال ءانشىسى كودجي تاماكي شاقىرىلدى. مۋزىكانت قوعام اراسىنا كوپتەن شىقپاي، ينتەرۆيۋ دە بەرمەي كەلگەن. جاپوندىق كورەرمەن بۇل شىعارىلىمدى تاعاتسىزدانا توستى.
باعدارلامانىڭ ارنايى شاقىرىلعان قوناقتارى دجەكي چۋن مەن ديماش قۇدايبەرگەن بولدى. قوس ءانشى دە كودجي تاماكيدىڭ ايگىلى «Autumn Strong» («Don’t Go») ءانىن جۇڭگو تىلىندە ورىنداعان.
گونكونگتىق ءانشى دجەكي چۋن اتالمىش كومپوزيسيانى جۇڭگو تىلىندە العاشقى بولىپ شىرقادى جانە قىتايلىق تىڭدارمان ونى ۇلكەن قوشەمەتپەن قابىلدادى.
كەيىننەن دجەكي ءچۋننىڭ ورىنداۋىنان شابىت العان ديماش قۇدايبەرگەن بۇل ءاندى 2017 جىلى قىتايدا «I am Singer» بايقاۋى كەزىندە ورىندادى. سودان بەرى كومپوزيسيا تەك ازيا ەلدەرىندە عانا ەمەس، سونداي-اق رەسەيدە جانە ەۋروپا ەلدەرىندە تانىمال.
«مەن كودجي تاماكيدى ءانشى رەتىندە وتە سىيلايمىن. «Don’t Go»-دى تىڭداعان كەزدە جاپون جۇرەگىنىڭ تەرەڭدىگى، جاپونيانىڭ جوعارى مادەنيەتىنىڭ بايلىعى سەزىلەدى. كودجي تاماكيدىڭ شىعارماشىلىعى ەشقاشان ەسكىرمەيدى جانە ءالى دە جاس ورىنداۋشىلارعا ۇلكەن اسەرىن تيگىزىپ كەلەدى. بىرەگەي شىعارماشىلىعىڭىزدى بۇدان ءارى دە دامىتىپ، تىڭدارماندارىڭىزدى قۋانتا بەرەسىز دەگەن ۇمىتتەمىن»، - دەدى ديماش قۇدايبەرگەن.
ءوز كەزەگىندە ك.تاماكي قازاقستاندىق انشىمەن كەزدەسكەنىنە قۋانىشىن ءبىلدىردى.
«ديماشتان جىلى لەبىز ەستىگەنىمە قۋانىشتىمىن. «Don’t Go»-دىڭ ءتۇرلى نۇسقاسى بار. جانە قاي كەزدە بولماسىن، بۇل كومپوزيانى ورىنداعان ءانشى، ءوز جاسىنا قاراماستان، ونىڭ تەرەڭدىگىن جەتكىزە ءبىلدى»، - دەدى جاپوندىق ءانشى.
ايتا كەتەيىك، «NHK Music Special» – ءار اي سايىن بەلگىلى ورىنداۋشىلار مەن مۋزىكانتتار شاقىرىلاتىن تانىمال باعدارلاما. وعان د.قۇدايبەرگەن قوناق رەتىندە شاقىرىلعانىن بۇعان دەيىن جازعان بولاتىنبىز.