ديماش قۇدايبەرگەن گەرمانيا جۇرتشىلىعىن ءتانتى ەتتى

بۇل ديماشتىڭ ناعىز تريۋمفى بولدى.

ميۋنحەن كونفەرەنسياسىنا قاتىسۋشىلار ديماشتىڭ ونەرىنە ورىندارىنان تۇرىپ، ۇزاق ۋاقىت دۋ قول شاپالاق سوعىپ، قۇرمەت كورسەتتى، دەپ حابارلادى Almaty-akshamy.kz Dimashnews.com  سىلتەمە جاساپ. 

DLD –الەمدى سيفرلاندىرۋعا ءوز ۇلەستەرىن قوسۋعا ات سالىساتىن ازاماتتار ءۇشىن قۇرىلعان ۇلكەن حالىقارالىق الاڭ. وندا ساياسات، عىلىم، مادەنيەت جانە ونەر سالاسىنداعى تانىمال ۆيزيونەرلەر ءوز تاجىريبەسىمەن بولىسەدى. كونفەرەنسياعا بىرنەشە جىل بويى قاتارىنان كەلە جاتقان سپيكەرلەردىڭ اراسىندا Facebook نەگىزىن قالاۋشى مارك سۋكەربەرگ، ءانشى لەدي گاگا، Microsoft كومپانياسىنىڭ باس ديرەكتورى ساتيا نادەللا، Twitterء-دىڭ نەگىزىن قالاۋشى دجەك دورسي، iPhone ونەرتاپقىشى توني فادەلل جانە باسقا دا بەلگىلى تۇلعالار قاتىسادى.

سونداي-اق شاراعا تانىمال مۋزىكالىق ورىنداۋشىلار شاقىرىلادى. Mobilium Global كومپانياسىنىڭ باس ديرەكتورى رالف سايمون بۇل جولعى كونفەرەنسياعا قازاقستان ءانشىسى ديماش قۇدايبەرگەندى شاقىرۋدى ۇسىنعان.

بيىل DLDء-دىڭ باستى ساحناسىندا العاش رەت قازاق حالىق اسپاپتارى شىرقالدى. ديماش ولجاس قۇرمانبەكتىڭ قوبىزبەن سۇيەمەلدەۋىمەن «S. O. S» جانە «Stranger» اندەرىن ورىندادى.

سونداي-اق Mobilium Global باس ديرەكتورى جۇرتشىلىق دومبىرا مەن قوبىزدىڭ تاڭعاجايىپ ۇنىنە قايران قالعانىن اتاپ ءوتتى.

«مەنىڭ ويىمشا، بۇل ديماشتىڭ ناعىز تريۋمفى بولدى. ديماشتىڭ ونەرىن تاماشالاۋ ءۇشىن بەرليننەن ميۋنحەنگە ارنايى ۇشىپ كەلگەن كورەرمەندەر بولدى»، – دەدى ول.