ءانشى الەمدىك ۇيلەسىمدىلىك يدەياسىنا نەگىزدەلگەن سينگلدى ۇسىندى.
ديماش الەمدىك جانە ءداستۇرلى دىندەر ليدەرلەرىنىڭ VII سەزى اياسىندا ونەر كورسەتتى، دەپ حابارلايدى Almaty-akshamy.kz Baq.kz سىلتەمە جاساپ.
VII سەزد دەلەگاتتارى مەن قاتىسۋشىلارىنا ارناپ ۇيىمداستىرىلعان «سانالۋاندىق بىرلىك» اتتى كونسەرتتىك باعدارلاما ءبىرقاتار بەلگىلى ءارى تالانتتى ونەرپازداردى ءبىر الاڭدا جينادى.
13 قىركۇيەكتە «استانا وپەرا» تەاترىندا وتكەن ارنايى شارادا الەمگە ايگىلى قازاقستاندىق ءانشى ديماش قۇدايبەرگەن جاڭا شىعارماسىن ورىندادى.
كەش بارىسىندا الەم جۇلدىزى ديماش قۇدايبەرگەن كورەرمەندەرگە تۇجىرىمداماسى ادامزات قوعامىنداعى ءوزارا سىيلاستىق پەن كەلىسىم پرينسيپتەرى ساقتالعان جاعدايدا عانا قول جەتكىزۋگە بولاتىن الەمدىك ۇيلەسىمدىلىك يدەياسىنا نەگىزدەلگەن سينگلدى ۇسىندى. سونداي-اق، انگە ءدىني جانە رۋحاني قۇندىلىقتار ادامدار اراسىنداعى جالپىعا ورتاق بەيبىتشىلىك پەن كەلىسىمگە جەتۋدىڭ ەڭ ماڭىزدى باعدارى ەكەنى ارقاۋ بولعان.
ديماش بۇل شىعارمانى جازۋدى 3 جىل بۇرىن باستاعان بولاتىن. ۇلىم كومپوزيسياعا بارىنشا جاۋاپكەرشىلىكپەن قارادى، بار ىنتاسىن سالدى. جاڭا تۋىندىنىڭ مۋزىكاسىنىڭ اۆتورى دا ءوزى. العاشىندا ىزگىلىك پەن تاتۋلىقتى تىڭدارمان بويىنا سىڭىرەتىن جىر جازۋ، حالىق بىرلىگىن كورسەتۋ كەرەك دەگەن وي عانا بولدى، – دەپ اتاپ ءوتتى مۋزىكانتتىڭ اكەسى قانات ايتبايەۆ جاڭا ءان تۋرالى.
كونسەرت باعدارلاماسى اياسىندا سەزد قاتىسۋشىلارىنا ارناپ قازاقستاننىڭ ەڭبەك سىڭىرگەن قايراتكەرلەرى ازامات جىلتىركوزوۆ، بيبىگۇل جانۇزاق، نۇربولات ارزاماس، ءجاميلا جارقىمبايەۆا، حالىقارالىق بايقاۋلاردىڭ لاۋرەاتى جاقسىكەلدى ماياساروۆ، پ.ي.چايكوۆسكيي حالىقارالىق بايقاۋىنىڭ لاۋرەاتى اقبيكە العي سەكىلدى ارتىستەر ونەر كورسەتتى. سونداي-اق شاراعا «استانا وپەرا» تەاترىنىڭ حورى، بالەت ترۋپپاسى مەن سيمفونيالىق وركەسترى، دومبىراشىلار ءانسامبلى، مەملەكەتتىك رەسپۋبليكالىق اكادەميالىق كورەي تەاترىنىڭ بي توبى، «استانا وپەرا» بالالار حورى، «استانا بالەت» تەاترى، «استانا سازى» ءانسامبلى جانە باسقا دا ءبىرقاتار بي ۇجىمدارى قاتىستى.
سەز باعدارلاماسىندا مادەني شارالاردىڭ تۇتاس توپتاماسى ەرەكشە ورىن الۋى كەزدەيسوقتىق ەمەس. مادەنيەت پەن ونەر – قوعامنىڭ رۋحاني دامۋىنىڭ اجىراماس سەرىگى، ءتىپتى شارتى. ال بۇگىندە بۇكىل الەم يدەولوگيالىق-قۇندىلىق داعدارىسىن باستان وتكەرىپ، قوعام ءۇشىن اسا ماڭىزدى مورالدىق نۇسقاۋلاردى ىزدەپ جاتقاندا بۇل جايتتىڭ ماڭىزى زور، – دەدى VII سەزدىڭ رەسمي وكىلى نازىم جانعازينوۆا.
ايتا كەتۋ كەرەك، قازاقستاندا «سانالۋاندىق بىرلىك» اتتى بىرىكتىرۋشى قاعيداتقا نەگىزدەلگەن كونفەسسياارالىق كەلىسىمنىڭ بىرەگەي مودەلى قالىپتاسقان. ول بەيبىتشىلىك يدەيالارىن جانە رۋحاني قۇندىلىقتاردى ىلگەرىلەتۋگە باعىتتالعان ءدىننىڭ بارلىق تۇرلەرىنە توزىمدىلىكپەن قاراۋعا نەگىزدەلگەن.
ءوز كەزەگىندە، الەمدىك جانە ءداستۇرلى دىندەر ليدەرلەرى سەزىنىڭ ەڭ ماڭىزدى مىندەتتەرى - ءدىنارالىق جانە كونفەسسياارالىق ديالوگ داستۇرلەرىن نىعايتۋ، ءدىني بىرلەستىكتەر اراسىنداعى ءوزارا تۇسىنىستىكتى تەرەڭدەتۋ، زاماناۋي قوعامدا تولەرانتتىلىق پەن ءوزارا قۇرمەت مادەنيەتىن دامىتۋ.
VII سەزدىڭ نەگىزگى كۇن تارتىبىندە ادامزاتتىڭ پاندەميادان كەيىنگى كەزەڭدەگى الەۋمەتتىك-رۋحاني دامۋ جولدارىن تالقىلاۋ بولادى دەپ كۇتىلۋدە.
VII سەزد جۇمىسىنا الەمنىڭ 50 ەلىنەن 100-دەن استام دەلەگاسيا قاتىسادى. دەلەگاتتار اراسىندا ريم پاپاسى فرانسيسك، ءال-ازحاردىڭ جوعارعى يمامى شەيح احماد ات-تايەب، ءيزرايلدىڭ باس اشكەنازي ءراۆۆينى داۆيد لاۋ، ءيزرايلدىڭ باس سەفارد ءراۆۆينى يسحاك يوسيف جانە باسقا دا ءدىني جەتەكشىلەر بار.
