اقش-تا تۇرىپ جاتقان ءانشى ەش جەردە وقىمايتىنىن ايتتى
وتكەن جىلدىڭ جەلتوقسان ايىندا ءانشى ديماش قۇدايبەرگەن «بولاشاق» حالىقارالىق ستيپەندياسىنىڭ يەگەرى اتاندى. الايدا ول ستيپەنديانى باسقا ۇمىتكەرگە بەرۋدى ءجون كوردى، دەپ حابارلايدى Almaty-akshamy.kz Egemen.kz-كە سىلتەمە جاساپ.
ديماش قۇدايبەرگەن «New York Film Academy» اكادەمياسىندا رەجيسسەر ماماندىعى بويىنشا تاعىلىمدامادان ءوتۋى كەرەك ەدى. ءبىراق ديماش قازاقستاندىق جۋرناليستكە بەرگەن سۇحباتىندا ول لوس-اندجەلەستە وقۋ ءۇشىن ەمەس، «تيتانيك» ءفيلمىنىڭ اتى اڭىزعا اينالعان مۋزىكاسىنىڭ اۆتورى، مۋزىكالىق پروديۋسەر ۆالتەر افاناسەففپەن ءان جازۋ ءۇشىن كەلگەنىن ايتتى.
«مەنىڭ جەكە كونسەرتتىك قىزمەتىم بار. دۇنيە جۇزىندەگى جانكۇيەرلەرىممەن كەزدەسىپ ءجۇرمىن. وسىنىڭ ءبارىن وقۋمەن قالاي ۇيلەستىرەمىن دەپ ۇزاق ويلاندىم. كوپ ادام مەنى لوس-اندجەلەستە وقيدى دەپ ويلايدى ەكەن. مەن تۇراتىن جەردە شوۋ-بيزنەس وتە قاتتى دامىعان. مىسالى، مەن بەيجىڭدە 4 جارىم جىل تۇردىم، كوپتەگەن كومپوزيتورلارمەن جۇمىس ىستەدىم، ءقازىر اقش-تا تۇرامىن، ءبىراق ەش جەردە وقىمايمىن.
تيتانيك ءانىن جانە باسقا دا كوپتەگەن تانىمال اندەردى شىعارعان ۋولتەر اعايدى ءبارىڭىز بىلەتىن شىعارسىز. ول - بۇگىندە اتى اڭىزعا اينالعان اندەردىڭ اۆتورى. سونىمەن، ءقازىر ءبىز ۋولتەر اعايمەن جۇمىس ىستەپ، ءان جازۋعا تىرىسامىز. جاقىندا بارلىقتارىڭىز بۇل اندەردى تىڭداي الاسىزدار دەپ ۇمىتتەنەمىن. جالپى، مەن ءقازىر تەك جۇمىسپەن، شىعارماشىلىقپەن اينالىسامىن»، - دەدى ديماش راشيت ءىلياسوۆقا بەرگەن سۇحباتىندا.
ديماش قۇدايبەرگەن وزىنە تيەسىلى «بولاشاق» ستيپەندياسىن كەلەسى جىلى تالانتتى قازاقستاندىققا تارتۋ ەتەتىنىن ايتتى.