ءبىر ادامنىڭ ءومىرىن قۇتقارۋ – ۇلكەن ماراپات.
تانىمال ءانشى ديماش قۇدايبەرگەن قايىرىمدىلىق ۇيىمىمەن بىرلەسىپ، ۇلتتىق عىلىمي ونكولوگيا ورتالىعىنا مەديسينالىق جابدىقتار مەن ماتەريالداردى سىيعا تارتتى، دەپ حابارلادى Almaty-akshamy.kz ءانشىنىڭ رەسمي سايتىنا سىلتەمە جاساپ.
2021 جىلعى 16 قاڭتاردا ديماش قۇدايبەرگەن Tixr امەريكاندىق پلاتفورماسىندا قايىرىمدىلىق سيپاتى بار Project C. U. R. E. كوممەرسيالىق ەمەس ۇيىمىمەن بىرگە «Dimash Digital Show» ونلاين-كونسەرتىن وتكىزدى. ديماش پەن رroject C. U. R. E. قايىرىمدىلىق ۇيىمىنىڭ بىرلەسكەن جۇمىسىنىڭ ناتيجەسىندە نۇر-سۇلتان قالاسىنىڭ ۇلتتىق عىلىمي ونكولوگيا ورتالىعىنا مەديسينالىق جابدىقتار مەن ماتەريالدار جەتكىزىلدى.
مەديسينالىق ورتالىققا كەرەۋەتتەر، مۇمكىندىگى شەكتەۋلى جاندارعا ارنالعان اربالار، حيرۋرگيالىق باس كيىمدەر، قولعاپتار، حيرۋرگيالىق ماسكالار، كوزىلدىرىكتەر، بەتپەردەلەر، N-95 حالاتتار مەن ماسكالار بەرىلدى. 2022 جىلدىڭ 21 اقپانىندا «DimashAli» شىعارماشىلىق ورتالىعىنىڭ جەتەكشىسى قانات ايتبايەۆ، «DimashNews» رەداكسياسى جانە جوبا ۇيلەستىرۋشىسى قىمبات جاقىپوۆا ۇعوو-عا بارىپ، جەتكىزىلگەن جۇكتى قاراپ، ورتالىق قىزمەتكەرلەرىمەن اڭگىمەلەستى.
«قازىرگى ۋاقىتتا الەمدەگى ەپيدەميولوگيالىق جاعدايدا ونكولوگيالىق ناۋقاستاردى ەمدەۋگە ارنالعان جابدىقتار مەن ماتەريالداردى ورتالىق بەلسەندى قولدانىپ جاتىر. كەرەۋەتتەر پالاتالارعا ورناتىلادى، مەديسينالىق ماتەريالدار قىزمەتكەرلەر مەن پاسيەنتتەردىڭ قاۋىپسىزدىگىن قامتاماسىز ەتۋدە»، – دەدى ۇعوو باسقارما ءتوراعاسىنىڭ ءبىرىنشى ورىنباسارى قانات ساتىبايەۆ.
كوروناۆيرۋس ينفەكسياسى بار ونكوگەماتولوگيالىق ناۋقاستارعا ارنالعان مامانداندىرىلعان بولىمدە جۇمىس ىستەۋ كەزىندە جەكە قورعانىس قۇرالدارى ەرەكشە ءرول اتقارادى. بۇل بولىمشە ۇعوو بازاسىندا اشىلدى، ويتكەنى مۇنداي پاسيەنتتەردى جالپى بەيىندەگى ستاسيونارلارعا جاتقىزۋ ونكولوگيالىق ناۋقاستارداعى نولدىك يممۋنيتەتتىڭ سالدارىنان وتە ۇلكەن قاۋىپكە يە. كەزدەسۋ قورىتىندىسى بويىنشا قانات ساتىبايەۆ ۇعوو اتىنان كورسەتىلگەن گۋمانيتارلىق كومەك ءۇشىن ديماش قۇدايبەرگەنگە العىسىن جەتكىزدى. ونىڭ جۇمىسىنا تابىس تىلەپ، اۋىر سىرقاتتىڭ سالدارىنان ومىردە ىنتاسىن جوعالتقان كوپتەگەن پاسيەنتتەر ءۇشىن شىعارماشىلىققا باۋلۋ وتە ماڭىزدى ءسات بولىپ تابىلاتىنىن جانە ادامداردىڭ ءارى قاراي ءومىر سۇرۋىنە كومەكتەسەتىنىن اتاپ ءوتتى.
«بۇل كومەك ءبىز ءۇشىن شىنىمەن مۇمكىن بولاتىن كومەك بولدى. جوعارىدا ايتقانىمداي، ءبىزدىڭ ورتالىقتىڭ نەگىزىندە ونكولوگيالىق ناۋقاستارعا ارنالعان COVID-بولىمشەسى اشىلدى، سوندىقتان ءبىز ولاردى كوۆيدتىك ستاسيونارعا جىبەرمەيمىز جانە ولار وسىندا ەمدەلدى. بىزگە وسىنداي مىندەت قويىلدى، ءبىز ونى تولىعىمەن ىسكە اسىردىق جانە بىزگە بەرىلگەن گۋمانيتارلىق كومەكتى قولداندىق. ءبىز بۇل مۇمكىندىكتى ناۋقاستارىمىزدىڭ يگىلىگى ءۇشىن ودان ءارى پايدالانۋدى جالعاستىرامىز. ءبىر ادامنىڭ ءومىرىن قۇتقارۋ – ۇلكەن ماراپات» ، – دەدى قانات ساتىبايەۆ.
ۇلتتىق عىلىمي ونكولوگيالىق ورتالىق 2018 جىلى قۇرىلدى جانە بۇگىندە ورتالىق ازيا ەلدەرىندە ونكولوگيا سالاسىنداعى جەتەكشى عىلىمي ورتالىق سانالادى. ونكولوگيا ورتالىعىندا جوعارى بىلىكتى ماماندار حالىقارالىق ستاندارتتارعا سايكەس پاسيەنتتەرگە ونكولوگيالىق كومەك كورسەتەدى، ونكولوگيالىق ىسىكتەر بويىنشا وپەراسيالاردىڭ بارلىق تۇرلەرىن جۇرگىزەدى، سونداي-اق بۇيرەك پەن باۋىر اۋىستىرىپ سالۋدى جۇزەگە اسىرادى. قازىرگى ۋاقىتتا ەلوردادا جوعارى تەحنولوگيالىق جابدىقتارمەن جابدىقتالعان جاڭا ونكولوگيالىق ورتالىق سالۋ جوباسى ىسكە اسىرىلۋدا، وندا حالىقارالىق تاجىريبە بەلسەندى پايدالانىلادى.
ۇلتتىق ونكولوگيا ورتالىعىندا ەڭ وزىق تەحنولوگيالار، ساۋلەلىك، لازەرلىك، پروتوندىق جانە يادرولىق مەديسينا بولىمشەلەرى ۇسىنىلاتىن عىلىمي-زەرتتەۋ زەرتحانالارىن، ءبىلىم جانە كلينيكالىق بازانى قامتيتىن حالىقارالىق دەڭگەيدەگى جەتەكشى ورتالىققا اينالادى دەپ جوسپارلانعان. پاسيەنتتەر قازاقستان اۋماعىندا ەرتە دياگنوستيكادان باستاپ جوعارى تەحنولوگيالىق ەمدەۋ مەن وڭالتۋعا دەيىنگى مەديسينالىق كومەكتىڭ بۇكىل كەشەنىن شەت ەلگە شىقپاي-اق الا الادى.