بارشا الەم حالقى باقىتتى بولسىن!
قازاقستاندىق تانىمال ءانشى ديماش قۇدايبەرگەن «Stranger» الەمدىك تۋرنەسىنەن تۇسكەن قاراجاتتىڭ ءبىر بولىگىن تۇركيادا قۋاتتى جەر سىلكىنىسىنەن زارداپ شەككەندەرگە اۋدارادى، دەپ حابارلايدى Almaty-akshamy.kz.
«قازاق حالقىنا باۋىرلاس، اعايىن ەل بولىپ سانالاتىن تۇركياداعى، سيرياداعى جانە باسقا دا ەلدەردە تابيعاتتىڭ زالالىنان كوپتەگەن ادامنىڭ قازا تاپقانىن ەستىدىك. ارينە، زور كۇيزەلىسپەن قابىلداپ وتىرمىز. بارلىق دۇنيە سالعان ادامداردىڭ جاقىندارىنا قايعىرا كوڭىل ايتامىز. اۋىر حالدە كۇي كەشىپ جاتقان باۋىرلارىمىزعا تەزىرەك ساۋىعىپ كەتۋىن تىلەيمىز»، - دەدى قازاقستاندىق ءانشى ءوزىنىڭ Instagram پاراقشاسىندا.
ءانشى الەم دەپ اتالاتىن ورتاق ءۇيىمىزدىڭ اماندىعىن تىلەدى.
«ءار وتباسىنا امانشىلىق تىلەيمىن. اسپانىمىز اشىق، الەم اتتى ورتاق ءۇيىمىز اپات پەن ءزىلزالادان امان بولسىن! ەلىمىزدە، الەمدە تىنىشتىق بولسىن! بارشا الەم حالقى باقىتتى بولسىن!» - دەيدى ديماش قۇدايبەرگەن.