مەملەكەت باسشىسى، قحا ءتوراعاسى قاسىم-جومارت توقايەۆتىڭ توراعالىعىمەن ءوتىپ جاتقان اسسامبلەيانىڭ ءحححى سەسسياسىندا بەلگىلى عالىم ديحان قامزابەك ۇلى ۇلتتىق ۇيىسۋداعى ماڭىزدى قاعيداتتارعا توقتالدى.
ءبىرىنشى قاعيدات – ەلدىك، مەملەكەتشىلدىك. الەمدىك پاراسات ورەسىندە ۇلت پەن مەملەكەت – ءبىر ۇعىم. جاڭا قازاقستان ءۇشىن باستى باعىت – «ءتۇرلى كوزقاراس – ءبىرتۇتاس ۇلت» دەڭگەيى. ەل مەن جەر تۇتاستىعى دا وسىنىڭ ىشىندە. ارينە، بۇعان ءبىرىنشى كەزەكتەگى جاۋاپتى – قازاق جۇرتى. ەلدى تۇتاستىراتىن قازىققا اينالۋ ءۇشىن اشىقتىقتىڭ، بەرىكتىكتىڭ، مەملەكەتشىلدىكتىڭ ونەگەسى بولۋعا ءتيىسپىز.
«ءاربىرىمىز بەلگىلى ءبىر وتباسىندا ومىرگە كەلدىك، بەلگىلى ءبىر ورتادا وستىك. ءبىراق كەلە-كەلە قوعام قايناۋىندا ەلدىك قۇندىلىقتاردى سىڭىردىك، جوعارى ءبىلىم الىپ، جەتىلدىك. ءبىزدىڭ ءبىر كەزدەگى وتباسى مەن ورتادا العان ءتالىمىمىز وتان مەن مەملەكەت مۇددەسىنە دەيىن كوتەرىلدى»، – دەدى د. قامزابەك ۇلى.
ەكىنشى قاعيدات – قوعامنىڭ جوعارى مادەنيەتى. قازاقستان حالقى اسسامبلەياسى مۇراتى تۇرعىسىنان ايتقاندا، ءار ەتنوستىڭ كوستيۋمى، ءدام ءمازىرى – ەتنوستانۋدىڭ بەرگى جاعى عانا. ونىڭ ارعى جاعى نەمەسە تەرەڭى – ءار ەتنوس عۇلامالارىنىڭ دانالىعىن، فيلوسوفيالىق وي-تولعامدارىن ءبىلۋ، ءتۇيسىنۋ جانە ناسيحاتتاۋ. «تاۋلاردى الاسارتپاي، دالانى اسقاقتاتۋدىڭ» ءمانى وسىندا. عالىمنىڭ ايتۋىنشا، وسىنىڭ ءبارى - جاڭا قازاقستان قوعامىن ۇيلەستىرۋشى كۇش، جوعارى مادەنيەت وزەگى.
ءۇشىنشى قاعيدات – ەڭبەك قۇندىلىعى جانە باردى ۇقساتۋ. قازاقستان قوعامى ءىستىڭ كوزىن تاباتىن كاسىبيلىككە، ەل ەڭسەسىن كوتەرەتىن جۇمىسقا، بىلىكتى ماماندارعا ءزارۋ.
«قىزىلوردادا جاڭا عاسىر اۋىلىن جاساعان ابزال ەرالييەۆ پەن اقمولادا «رودينا» اگروفيرماسى اياسىندا زاماناۋي سەلو قالىپتاستىرعان يۆان ساۋەر تاجىريبەسى – كوپكە ۇلگى. ءاربىر سالادا، ءاربىر ىستە، اسىرەسە، سولتۇستىك وڭىرلەر مەن شەكارالىق ايماقتاردا، تاعدىرى اۋىر مونوقالالاردا وسىنداي باستاماشىلدىقتى ىنتالاندىرۋىمىز كەرەك»، – دەپ تۇيىندەدى ءوز ويلارىن عالىم.