كوتەرىلىسشىلەرگە قارسى كۇرەس جونىندەگى الەمگە ايگىلى ءۇندى مەكتەبىنىڭ بازاسىندا تومەن قارقىندىلىقتاعى ۇرىس قيمىلدارىن جۇرگىزۋ كۋرسىنان ءساتتى وتكەن 15 قازاقستاندىق دەسانتشى ۇيىنە ورالدى.
وقۋ كۋرسى تۋرا ەكى اپتاعا سوزىلدى. وقۋدىڭ 90%-ى كۇندىز-تۇنى وتكىزىلەتىن پراكتيكالىق ساباقتاردان تۇردى، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
– وسى ۋاقىت ىشىندە ءبىز جاڭا جاتتىعۋلاردى، دجۋنگلي مەن تاۋلى جەرلەردە ۇرىس قيمىلدارىن جۇرگىزۋدىڭ تاكتيكالىق ەلەمەنتتەرىن زەردەلەدىك. كۇندىزگى ساباقتاردا دروندار، مينادان تازارتۋ ءۇشىن روبوتتار بەلسەندى قولدانىلدى، ال قاراڭعى تۇسە، جىلۋعا دەن قويۋ كوزدەۋىشى پايدالانىلدى، – دەدى دەسانتتىق-شابۋىلداۋ اسكەرلەرى قولباسشىلىسى باسقارماسىنىڭ وكىلى كاپيتان ۆيتاليي ستەفانوۆيچ.
وفيسەردىڭ ايتۋىنشا، بۇل تەرروريزمگە قارسى وپەراسيالاردى جۇرگىزۋدىڭ تولىق كۋرسى بولدى. دەسانتتىق-شابۋىلداۋ اسكەرلەرىنىڭ جەكە قۇرامى شاعىن توپتاردى جەرگىلىكتى جەردىڭ ءار ءتۇرلى جاعدايلارىندا قولدانۋدا ايتارلىقتاي زور تاجىريبە الدى.
دەسانتشىلار ەڭ ۇمىتىلماس ءسات كۇش-قۋات بەلسەندىلىگى ەمەس، جىلانداردى، جاندىكتەر مەن ءتۇرلى ەكزوتيكالىق وسىمدىكتەرمەن تاماقتانۋ ارقىلى دجۋنگليدە ءومىر ءسۇرۋ كۋرسى بولعانىن ايتادى. ءبىراق ساباقتاردىڭ نەگىزى تىعىز وسىمدىكتەر مەن شەكتەۋلى كورىنۋ جاعدايىندا بارلاۋ ارەكەتتەرىن ۇيرەتۋ بولدى. بۇل بلوكتا دەسانتشىلار بەيتانىس جەردەگى ارەكەتتەرگە قاراماستان جوعارى داعدىلاردى كورسەتە ءبىلدى.
كۋرستىڭ بارلىق تاقىرىپتارى تەوريادان پراكتيكاعا جوسپارلانعان. الدىمەن ەكى ساعات بويى تىڭداۋشىلار تەوريانى، ىس-ارەكەتتىڭ ەرەكشەلىكتەرىن زەردەلەپ، سودان كەيىن مەكتەپتەگى وقۋ-جاتتىعۋ بازاسىندا جاتتىقتى. سوسىن تۇنگى جاعدايدا ەمتيحان تاپسىردى. ەگەر كۇندىز نۇسقاۋشىلار دەسانتشىلاردىڭ ىس-ارەكەتتەرىن ۇسىنا نەمەسە تۇزەتە السا، وندا ولار ەمتيحاندا تەك باقىلاۋشى رەتىندە ارەكەت ەتتى.
كۋرس سوڭىندا بارلىق دەسانتشىلارعا سەرتيفيكاتتار مەن ەستەلىك سىيلىقتار تابىستالدى.
ەستەرىڭىزگە سالا كەتەيىك، قازاقستان مەن ءۇندىستان ۇزاق ۋاقىت بويى اسكەري ىنتىماقتاستىق ءىس-شارالارىن، ەڭ الدىمەن قازاقستاندىق تاراپتى بىتىمگەرلىك قىزمەتكە دايىنداۋ شەڭبەرىندە جۇزەگە اسىرىپ كەلەدى.
سونىمەن قاتار، ەلدەر تەرروريزمگە قارسى كۇرەستە ەكىجاقتى ىنتىماقتاستىقتى تەرەڭدەتۋدە. قازان ايىندا ءۇندىستاندا «ءقازۇندى-2024» وقۋ-جاتتىعۋى ءوتتى. وعان دەسانتتىق-شابۋىلداۋ اسكەرلەرى مەن «وڭتۇستىك» وڭىرلىك قولباسشىلىعىنىڭ اسكەري قىزمەتشىلەرى قاتىستى. دەسانتتاۋ كەزەندە قازاقستاندىق اسكەري قىزمەتشىلەر ۇندىلىك ارىپتەستەرىمەن بىرلەسىپ، تاۋلى جەردە قيىن جاعدايدا 3500 مەتر بيىكتىكتەن شەكتەۋلى الاڭعا پاراشيۋتپەن سەكىردى.
تۇراقتى بىرلەسكەن اسكەري وقۋ-جاتتىعۋلارى مەن وقىتۋ كۋرستارىن وتكىزۋ ءۇندىستان مەن قازاقستاننىڭ بەيبىتشىلىكتى، تۇراقتىلىق پەن وڭىرلىك قاۋىپسىزدىكتى نىعايتۋ سالاسىنداعى ءوزارا مۇددەلەستىگىن كورسەتەدى.