ۇشۋ جىلدامدىعى ساعاتىنا 180 شاقىرىم، بيىكتىك – 800 مەتر
دەسانتتىق-شابۋىلداۋ اسكەرلەرىنىڭ اسكەري قىزمەتشىلەرى اسكەري-كولىكتىك اۆياسيا ۇشاقتارىنان پاراشيۋتپەن سەكىرۋ تاسىلدەرىن پىسىقتادى، دەپ حابارلايدى Almaty-akshamy.kz.
بۇل شاراعا الماتى، قونايەۆ جانە جەتىسۋ گارنيزوندارىنىڭ 200-دەن استام وفيسەرى مەن كەلىسىمشارت بويىنشا اسكەري قىزمەتشىسى تارتىلدى. اسكەري-كولىكتىك اۆياسيانىڭ س-295 ۇشاعىنان سەكىرۋ ۇزاق ۇزىلىستەن كەيىن العاش رەت جۇرگىزىلىپ وتىرعانىن ايتا كەتۋ كەرەك.
دەسانتتىق-شابۋىلداۋ اسكەرلەرى قولباسشىسى باسقارماسىنىڭ اۋە-دەسانتتىق قىزمەتىنىڭ وفيسەرلەرى جەكە قۇرامعا ۇشاقتان پاراشيۋتپەن سەكىرۋدى ۇيىمداستىرۋ مەن سەكىرۋ بويىنشا نۇسقاۋلىق-ادىستەمەلىك ساباقتار وتكىزدى. وندا سەكىرۋ ەلەمەنتتەرىن جەردە پىسىقتاۋ مەن پاراشيۋت جۇيەلەرىن كەزەڭ-كەزەڭىمەن توسەۋ دە جۇزەگە استى.
اسكەرلەردىڭ قولباسشىسى، گەنەرال-مايور الماز جۇماكەيەۆ دەسانتشىلارعا ءتان ناعىز ەرلىكتىڭ نەدەن قۇرالاتىنىن اتاپ ءوتتى.
– كەز كەلگەن ادام پاراشيۋتپەن سەكىرەردە ۇرەيگە بوي الدىرادى ءبىراق ءبىز، دەسانتشىلار، بۇل ۇرەيدى ەڭسەرە وتىرىپ، جۇكتەلگەن تاپسىرمانى ناقتى ورىنداي الاتىنىمىزبەن ەرەكشەلەنەمىز. ەرجۇرەكتىلىك دەگەن، مىنە، وسى، – دەدى گەنەرال-مايور الماز جۇماكەيەۆ.
دەسانتتىق-شابۋىلداۋ اسكەرلەرىنە 2017 جىلدان كەيىن كەلگەن وفيسەرلەر مەن كەلىسىمشارت بويىنشا اسكەري قىزمەتشىلەردىڭ كوپشىلىگى س-295 ۇشاعىنان ءبىرىنشى رەت سەكىرىپ وتىر.
– اسكەري-كولىكتىك اۆياسيا ۇشاعىنان پاراشيۋتپەن سەكىرۋگە تىكۇشاقتان كەمىندە بەس رەت سەكىرگەن اسكەري قىزمەتشىلەر عانا جىبەرىلەدى. سوندىقتان مەرزىمدى قىزمەتتىڭ ساربازدارى بۇعان قاتىسپايدى، – دەپ ءتۇسىندىردى دەسانتتىق-شابۋىلداۋ اسكەرلەرى قولباسشىسىنىڭ ورىنباسارى، پولكوۆنيك نۇرماحان قۇدايبەرگەنوۆ.
اسكەري-كولىك اۆياسياسىنىڭ ۇشاعىنان سەكىرۋ جوعارى كۇردەلىلىگىمەن ەرەكشەلەنەدى. ۇشۋ جىلدامدىعى ساعاتىنا 180 شاقىرىم، بيىكتىك – 800 مەتر. مۇنىڭ ءبارى جەكە قۇرامنان ارنايى دايىندىق پەن داعدىنى تالاپ ەتەدى.
مي-17 جانە مي-8 تىكۇشاقتارىنان، ادەتتە، ۆزۆودتى سەكىرتۋ جۇرگىزىلسە، ال س-295 ۇشاعىن قولدانا وتىرىپ، سەكىرۋدە بۇل سان روتاعا دەيىن ارتادى. ءوز كەزەگىندە بۇل اۋقىمدى جاۋىنگەرلىك مىندەتتەردى ورىنداۋعا مولىنان مۇمكىندىك بەرەدى.