ءماجىلىستىڭ جالپى وتىرىسىندا دەپۋتات ەرلان سمايلوۆ جاردەماقى مەن زەينەتاقى كولەمىن ارتتىرۋ ماسەلەسىن كوتەردى، دەپ حابارلايدى almaty-akshamy.kz قازاقپاراتقا سىلتەمە جاساپ.
«ازىق-تۇلىك ءونىمى، كوممۋنالدىق قىزمەت ءتاريفى باعاسىنىڭ تۇراقتى ءوسۋى مەن جالپى ءومىر ءسۇرۋ قۇنىنىڭ قىمباتتاۋى جاعدايىندا مۇگەدەكتىگى بار ادامدارعا، بالا تۋۋىنا بايلانىستى دەمالىستا وتىرعان انالارعا، كوپبالالى وتباسىلارعا، زەينەتكەرلەرگە جانە حالىقتىڭ باسقا دا توبىنان شىققان ميلليونداعان قازاقستاندىقتارعا مەملەكەتتىك جاردەماقى مەن زەينەتاقى كولەمىنىڭ ارتۋى اسا ماڭىزدى ماسەلە. پرەزيدەنت قاسىم-جومارت كەمەل ۇلى توقايەۆتىڭ شەشىمى بويىنشا 2022 جىلعى 1 قاڭتاردان باستاپ ەڭ تومەنگى جالاقى قازىرگى 42 500 تەڭگەدەن 60 مىڭ تەڭگەگە نەمەسە 41%-عا وسەدى. الايدا ەڭبەك جانە حالىقتى الەۋمەتتىك قورعاۋ مينيسترلىگى مۇگەدەكتىگى بار ادامداردىڭ، ءبىر جاسقا دەيىنگى بالا كۇتىمىنە بايلانىستى ۇيىندە وتىرعان انالاردىڭ، كوپبالالى وتباسىلاردىڭ جاردەماقىسىن، سونىمەن قاتار ەڭ تومەنگى زەينەتاقىنى ۇلعايتۋ ماسەلەسىن قاراستىرىپ جاتقان جوق»، - دەدى ە. سمايلوۆ پرەمەر-مينيستردىڭ ورىنباسارى ەرالى توعجانوۆتىڭ اتىنا جولداعان ساۋالىندا.
ونىڭ ايتۋىنشا، 2022-2024 جىلدارعا ارنالعان بيۋدجەت جوباسىندا مينيسترلىك الەۋمەتتىك جاردەماقىنىڭ بارلىق ءتۇرىن 2022 جىلعى 1 قاڭتاردان باستاپ 5%-عا ارتتىرۋدى جوسپارلاپ وتىر. ءبىراق بۇل كولەم ينفلياسيانىڭ ستاتيستيكالىق ءوسىمى تۇگىلى، ازىق-تۇلىك پەن كيىمنىڭ، ءتۇرلى قىزمەتتەر مەن تاريف باعاسىنىڭ شىعىنىن جاپپايدى.
«جاردەماقى مەن زەينەتاقىنىڭ مولشەرى ەل ازاماتتارىنىڭ ناقتى قاجەتتىلىگىنە ساي كەلمەيتىنىن جانە ولاردىڭ ساپالى ءومىر ءسۇرۋ دەڭگەيىن قامتاماسىز ەتە المايتىنىن ايعاقتايدى. بۇل رەتتە ەڭبەك جانە حالىقتى الەۋمەتتىك قورعاۋ مينيسترلىگىنىڭ قازاقستاندىقتاردىڭ مۇددەسىنە ساي كەلمەيتىن ۇستانىمدا بولۋى الاڭداتادى. حالىقتى قورعاپ، ۇكىمەت پەن ۇلتتىق ەكونوميكا جانە قارجى مينيسترلىكتەرى الدىندا ماسەلە قويۋدىڭ ورنىنا، مينيسترلىك بيۋدجەت قاراجاتىنىڭ تاپشىلىعىنا سىلتەمە جاسايدى. سالالىق مينيسترلىك حالىقتى قورعاۋ جولىنداعى ءوز ميسسياسىنىڭ يدەولوگياسى مەن تۇسىنىگىن الدەقاشان جوعالتقان رەسپۋبليكالىق ۇيىمعا اينالدى»، - دەدى دەپۋتات.
ونىڭ پايىمىنشا، مەملەكەتتىك ورگاننىڭ مىندەتىنە ءاتۇستى قاراۋى ەڭبەك سالاسىنا دا اسەرىن تيگىزدى.
«ارينە، مەملەكەتتىك بيۋدجەت شەكسىز ەمەس، الايدا ۇتىمدى جوسپارلاۋ مەن پايدالانۋ ارقىلى ونىڭ مۇمكىندىگىن ايتارلىقتاي كەڭەيتۋگە بولادى. بۇل تۋرالى جىل سايىن ەسەپ كوميتەتى جۇزدەگەن ميلليارد قاراجات ءتيىمسىز جوسپارلاناتىنى جانە پايدالانىلاتىنى تۋرالى قورىتىندى بەرەدى. بۇعان اۋىل شارۋاشىلىعى سالاسىن سۋبسيديالاۋ كەزىندە ميللياردتاعان، ءتىپتى تريلليونداعان قارجىنىڭ جىمقىرىلۋى دالەل»، - دەدى ول.
جوعارىدا ايتىلعاندارعا بايلانىستى «قازاقستان حالىق پارتياسى» دەپۋتاتتىق فراكسياسى ق ر ۇكىمەتىنە 2022 جىلعى 1 قاڭتاردان باستاپ مۇگەدەكتىگى بار ادامداردىڭ، بالا كۇتىمى بويىنشا ۇيدە وتىرعان ايەلدەردىڭ، كوپبالالى وتباسىلاردىڭ جاردەماقىسى كولەمىن ارتتىرۋدى ۇسىندى.