بۇگىن ءماجىلىس دەپۋتاتى نارتاي سارسەنعالييەۆ اۋىلدارداعى مەكتەپتەردىڭ جابىلۋىنا قاتىستى پرەمەر-مينيستردىڭ ورىنباسارى ەرمەك كوشەربايەۆقا ساۋال جولدادى، - دەپ حابارلايدى aqshamnews.kz ءتىلشىسى.
دەپۋتاتتىڭ ايتۋىنشا، بالا سانىنىڭ ازدىعىنا بايلانىستى باتىس قازاقستان وبلىسىندا كەيىنگى ءۇش جىلدا 12 باستاۋىش مەكتەپ جابىلعان، ال 2024 جىلى 4 باستاۋىش مەكتەپ تاراتىلعان.
"ءقازىر ءبىر ءقاۋىپتى تەندەنسيا بار، اۋىلىنداعى مەكتەپ جابىلعاندىقتان باسقا ەلدى-مەكەنگە ءماجبۇرلى تۇردە وقۋعا اتتانعان وقۋشىلاردىڭ اتا-انالارى دا كوشىپ جاتىر. ال ادامى كوشكەن اۋىلدىڭ كارتادان وشەتىنى بەلگىلى. بۇل قازاقستانعا ۇلكەن قاتەر توندىرەدى، ءبىر عانا دەرەك ايتايىن: سوڭعى 5 جىلدا ەلىمىزدە 194 اۋىل جابىلىپ قالدى. بۇگىنگىدەي بۇيرىقتىڭ بۇيداسىمەن كەتە بەرسەك بۇل سان كوبەيەتىنى انىق. سەبەبى مەكتەپتىڭ جۇمىس ىستەپ تۇرۋى ءۇشىن بەلگىلەنگەن ەڭ از وقۋشى سانىنا سۇراق جەتىپ ارتىلادى. ويتكەنى ءبىر وڭىردە ادام كوپ، ءبىر وڭىردە ادام از. سوندىقتان ءبىر ستاندارتتا بارىنە بىردەي تاڭۋ قاتە. ەندەشە اتالعان نورماتيۆتەردى قايتا قارايتىن كەز كەلدى. سەبەبى باتىس قازاقستان وبلىسىنىڭ رەسەي فەدەراسياسىمەن شەكتەسەتىن 8 اۋدانىنىڭ 7-ىندە بالا سانىنىڭ ازدىعىنا بايلانىستى مەكتەپتەر جابىلماقشى. نورماتيۆكە وزگەرىس ەنگىزبەسەك تاعى 13 مەكتەپتى تولىق كولەمدە ساقتاپ قالا المايمىز"، - دەيدى ول.
سونداي-اق، دەپۋتات مىناداي ۇسىنىس ايتتى.
"وسىعان وراي ناقتى ۇسىنىس: قازاقستان رەسپۋبليكاسىنىڭ ءبىلىم جانە عىلىم مينيسترلىگىنىڭ 2022 جىلعى 6 مامىرداعى №185 "حالىقتىڭ تىعىزدىعىنا جانە ەلدى-مەكەندەردىڭ قاشىقتىعىنا قاراي ءبىلىم بەرۋ ۇيىمدارى جەلىسىنىڭ كەپىلدىك بەرىلگەن مەملەكەتتىك ءنورماتيۆىن بەكىتۋ تۋرالى" بۇيرىعىندا كورسەتىلگەن 2.2.، 2.3.، 2.4. - تارماقتارىن "ەرەكشە جاعدايدا دەگەن تىركەسپەن تولىقتىرۋ نەمەسە شەكارا ماڭىندا ورنالاسقان مەكتەپتەر ءۇشىن اتالمىش تارماقتاردا بەلگىلەنگەن نورماتيۆتەردىڭ شەگىن ازايتۋدى ۇسىنامىن. ايتپەسە شەكارالىق اۋىلدار مەكتەپسىز قالادى، سالدارىنان ەل كوشەدى، جەر يەسىز بولادى. ال "بوس جاتقان جەر جاۋ شاقىرادى"، بۇل قازاقتىڭ ءسوزى"، - دەدى ول.