بۇگىننەن باستاپ دەنساۋلىق ساقتاۋ مينيسترلىگى ەپيدەميولوگيالىق جاعدايدى باعالاۋ ماتريساسىن وزەكتەندىردى.
وندا 100 مىڭ تۇرعىنعا شاققاندا 7 كۇن ىشىندە ورتاشا تاۋلىكتىك سىرقاتتانۋشىلىق كورسەتكىشى 100 مىڭ تۇرعىنعا شاققاندا ەمدەۋگە جاتقىزىلعانداردىڭ تاۋلىكتىك كورسەتكىشى قايتا قارالدى. بۇل تۋرالى دەنساۋلىق ساقتاۋ ءمينيسترى اجار عينيات مالىمدەدى، دەپ حابارلايدى Almaty-akshamy.kz Elorda.info-عا سىلتەمە جاساپ.
ماتريسا قوعامدىق دەنساۋلىق ساقتاۋ سالاسىنداعى ۇلتتىق ساراپشىلاردىڭ جانە دۇنيەجۇزىلىك دەنساۋلىق ساقتاۋ ۇيىمى ساراپشىلارىنىڭ قاتىسۋىمەن وزەكتەندىرىلدى. ماتريسانى قايتا قاراۋ كەزىندە ينفەكسيالىق ستاسيونارلار مەن قارقىندى تەراپيا بولىمشەلەرىندەگى ەمدەۋگە جاتقىزۋ دەڭگەيىنەن، حالىقتى ۆاكسيناسيالاۋمەن قامتۋ دەڭگەيىنەن، ينفەكسيانىڭ تارالۋىنان جانە كوروناۆيرۋستىق ينفەكسيانىڭ اينالىمداعى نۇسقالارىنان اعىمداعى ەپيدەميولوگيالىق احۋالدى باعالاۋ بولىگىندە ددۇ ۇسىنىمدارى ەسكەرىلدى.
«ماسەلەن، جاسىل ايماقتا – R رەپرودۋكتيۆتى سانىنىڭ كورسەتكىشىنە قاراماستان، 2 500-گە دەيىن توسەك-ورىن قامتىلعاندا، سونداي-اق 5 000-عا جۋىق توسەك-ورنى قامتىلعاندا جانە R رەپرودۋكتيۆتى كورسەتكىشى 1-دەن كەم بولعاندا. سارى ايماقتا – شامامەن 5000 توسەك-ورىن جانە R 1-دەن كوپ بولعاندا؛ نەمەسە 5000-نان 10 000-عا دەيىن توسەك-ورىن جانە R 1-دەن از بولعاندا. قىزىل ايماق – 5000-نان ارتىق توسەك-ورىن قامتىلسا جانە R 1-دەن كوپ بولعان كەزدە؛ نەمەسە اۋرۋدىڭ تارالۋىنا قاراماستان، ءبىراق قامتىلۋ 10 000-نان استام بولسا – بۇل جاعداي قيىن ەكەنىنىڭ بەلگىسى. سىرقاتتانۋشىلىق جوعارى بولۋى مۇمكىن ەكەنىنە قاراماستان، ناۋقاستاردىڭ 90%-ى امبۋلاتوريالىق ەم قابىلداۋدا. اۋرۋ جەڭىل، ورتاشا جانە اۋىر تۇردە وتەدى، بۇل رەتتە ءولىم-جىتىم نولگە تەڭ»، - دەدى مينيستر.