بيىل 13 مىڭنان استام ادام قىزىلشا جۇقتىرعان.
اجار عينيات قازاقستاندىقتاردى قىزىلشاعا قارسى ەكپە الۋعا شاقىردى، دەپ حابارلايدى Almaty-akshamy.kz ۇكىمەتتىڭ رەسمي ارناسىنا سىلتەمە جاساپ.
قازىرگى ۋاقىتتا قازاقستاندا، سونداي-اق الەمنىڭ كوپتەگەن ەلىندە قىزىلشا اۋرۋىنا قاتىستى قولايسىز ەپيدەميولوگيالىق جاعداي قالىپتاسىپ وتىر.
مينيستر سوڭعى ەكى ايدا ەلىمىزدە سىرقاتتانۋشىلار سانى كۇرت وسكەنىن، بيىل 13 مىڭنان استام ادام قىزىلشا جۇقتىرعانىن مالىمدەدى. ونىڭ ايتۋىنشا، اۋرۋ جۇقتىرعانداردىڭ 83 پايىزى بالالار، نەگىزىنەن 5 جاسقا دەيىنگىلەر. ولاردىڭ 70 پايىزى ەكپە الماعان. ناۋقاستاردىڭ اراسىندا ەكپە الماعان ەرەسەكتەر دە بار.
اجار عينيات ينفەكسيانىڭ تارالۋىنىڭ ارتۋى سالدارىنان قازاقستاندا قوسىمشا جاپپاي ەكپە الۋدى جۇرگىزۋ تۋرالى شەشىم قابىلدانعانىن، بۇل قاڭتار ايىنىڭ سوڭىنا دەيىن جالعاساتىنىن ايتتى.
ءمينيستردىڭ ايتۋىنشا، ەلىمىزدە ۆاكسينا جەتكىلىكتى.
«ۆاكسينالاۋ مارتەبەسى جوق بالالارعا، ينفەكسيا وشاقتارىندا بولعان ەرەسەكتەرگە ەكپە ەگەمىز. بارشاڭىزدى اۋرۋدان ساقتانۋ ءۇشىن ەمحاناعا شاقىرامىز»، - دەدى اجار عينيات.
دەنساۋلىق ساقتاۋ ءمينيسترى ينفەكسيالىق اۋرۋدىڭ ەكپەمەن الدىن الۋعا بولاتىنىن ەسكەرتتى.
«بۇگىنگى تاڭدا قىزىلشا ۆيرۋسىنىڭ وزىنە ءتان ەمى جوق، سوندىقتان مۇنداي ءقاۋىپتى ينفەكسيادان قۇتىلۋدىڭ جالعىز جولى ەكپە ەگۋ بولىپ وتىر. ۆاكسينانىڭ وزىنەن قورىقپاۋ كەرەك، ول تەكسەرىلگەن. ءبىز ونى جىل سايىن ۇلتتىق ەگۋ كۇنتىزبەسىنە سايكەس قولدانامىز»،-دەدى اجار عينيات.