جارىسقا 20 مەملەكەتتەن 100 سپورتشى قاتىسادى.
ەلوردادا 28-31 قازان ارالىعىندا «بارىس ارەنادا» مانەرلەپ سىرعاناۋدان ەكىنشى Denis Ten Memorial Challenge حالىقارالىق ءتۋرنيرى وتەدى، دەپ حابارلايدى Almaty-akshamy.kz Baq.kz-سىلتەمە جاساپ.
ءتۋرنيردى مادەنيەت جانە سپورت مينيسترلىگى، ۇلتتىق وليمپيادا كوميتەتى مەن نۇر-سۇلتان قالاسىنىڭ اكىمدىگىنىڭ قولداۋىمەن «دەنيس تەن قورى» قوعامدىق قورى ۇيىمداستىرادى.
بيىل جارىسقا 20 مەملەكەتتەن كەلگەن 100 سپورتشى قاتىسادى. بۇل قاتاردا وسى جىلى وتكەن الەم چەمپيوناتىنىڭ جۇلدەگەرلەرى مەن كەلەر جىلى بەيجىڭدە جالاۋى جەلبىرەيتىن اق وليمپيادانىڭ كوشباسشىلارى بار. ەرەسەكتەر مەن جاسوسپىرىمدەر توبىنا بولىنگەن مانەرلەپ سىرعاناۋشىلار جەكەلەي جانە جۇپتىق سىندا ونەر كورسەتەدى.
Denis Ten Memorial Challenge مانەرلەپ سىرعاناۋدان بيىل «چەللەندجەر» (ISU Challenger Series) ساناتىندا وتەتىن 7ء-شى جارىس. حالىقارالىق كونكيشىلەر وداعى (ISU) اتالعان ساناتتاعى حالىقارالىق تۋرنيرلەردى 2014 جىلدان بەرى جىلدا 5 قىركۇيەك پەن 15 جەلتوقسان اراسىندا گران-پري سەرياسىنا قوسىمشا جارىس رەتىندە وتكىزىپ كەلەدى. ISU جىل سايىن تۋرنيرلەر ءتىزىمىن قايتا بەكىتەدى.
«چەللەندجەر» سەرياسىنداعى جارىستا 1-5ء-شى ورىن العان مانەرلەپ سىرعاناۋشىلار حالىقارالىق رەيتينگتە گران-پري، الەم جانە قۇرلىق چەمپيوناتىنا قاتىسقان سپورتشىلاردان كەيىن ەڭ كوپ ۇپايعا يە بولادى.
ءار جەكەلەي مانەلەپ سىرعاناۋشى، يا بولماسا جۇپ «چەللەندجەر» سەرياسىنداعى 3 جارىسقا قاتىسا الادى. ال قاتىسۋشىلار رەيتينگى تۇزىلگەن كەزدە سپورتشىلاردىڭ تەك ەكى سەرياداعى ۇزدىك كورسەتكىشى ەسەپكە الىنادى. سەريا قورىتىندىسى بويىنشا ەرەسەكتەر مەن جاسوسپىرىمدەر ساناتىنداعى ۇزدىك ۇشتىككە قارجىلاي سىياقى تابىستالادى.
ايتا كەتەيىك، «چەللەندجەر» سەرياسىنا كىرەتىن ورتا ازياداعى ەڭ ءىرى باسەكە – Denis Ten Memorial Challenge حالىقارالىق ءتۋرنيرى العاش رەت 2019 جىلى 10-13 قازان ارالىعىندا الماتى قالاسىندا وتكەن. ول تۋرينرگە 18 ەلدىڭ مانەرلەپ سىرعاناۋشىسى قاتىسقان ەدى.