ءبىلىم بەرۋ ستاندارتتارى ساقتالادى
ق ر وقۋ-اعارتۋ مينيسترلىگى جاڭا وقۋ جىلىنان باستاپ مەكتەپتەردە دەنە شىنىقتىرۋ ساباعىن شاعىن توپتارعا بولمەۋ سەبەبىن ءتۇسىندىردى، دەپ حابارلايدى Almaty-akshamy.kz قازاقپارات-قا سىلتەمە جاساپ.
«جاڭا وقۋ جىلىندا 1-11 سىنىپ ارالىعىنداعى بالالار اپتاسىنا 3 ساعات دەنە شىنىقتىرۋ ساباعىن وتەدى. وتكەن جىلدارى دا وسىلاي بولعان. مۇندا ەشقانداي وزگەرىس جوق. جاڭا وقۋ جىلىنان باستاپ مەملەكەتتىك ءبىلىم بەرۋ ستاندارتىنا سايكەس دەنە شىنىقتىرۋ ساباعىندا سىنىپ شاعىن توپتارعا بولىنبەيدى. بۇل رەتتە مەكتەپ باعدارلامالارىندا قىزدار مەن ۇلداردىڭ دەنە شىنىقتىرۋ جاتتىعۋلارىنىڭ جەكەلەگەن نورماتيۆتەرى بار، ولار ساباقتا مىندەتتى تۇردە ساقتالۋى ءتيىس. 2021 جىلدان باستاپ ۇيىرمەلەر مەن سپورت سەكسيالارىنا مەملەكەتتىك تاپسىرىستى ورنالاستىرۋ مۇمكىندىگى قاراستىرىلعانىن ايتا كەتكەن ءجون. ءتيىستى مينيسترلىك جەلىسى ارقىلى سپورتتىق تاپسىرىس ورنالاستىرىلادى. مۇنىڭ بارلىعى سپورتپەن شۇعىلدانۋعا جاعداي جاساپ وتىر»، - دەپ اتاپ ءوتتى مينيسترلىكتەن.
ۆەدومستۆو مالىمەتىنشە، حالىقارالىق تاجىريبەدە دە (جاپونيا، اقش، گەرمانيا، كورەيا، فينليانديا جانە ت.ب.) دەنە شىنىقتىرۋ ساباعىندا قىزدار مەن ۇلدار بولەك وقىتىلمايدى. كوپتەگەن شەت ەلدە دەنە شىنىقتىرۋ ساباقتارى اپتاسىنا كەمىندە ءۇش رەت وتكىزىلەدى، ەڭ كوپ ساعاتتار باستاۋىش مەكتەپتە.
سونىمەن سىنىپتى توپتارعا ءبولۋ مىناداي سەبەپتەرگە بايلانىستى توقتاتىلدى:
- مەكتەپتەردىڭ كوپشىلىگىندە ءبىر سپورت زالى بار. وندا ءبىر ساباقتا 2-3 سىنىپ، ياعني 4-6 شاعىن توپقا دەيىن بولادى. ولارعا ءبىر ۋاقىتتا 6 مۇعالىمگە دەيىن ساباق بەرەدى. ياعني مۇنداي ساباقتاردا ەشقانداي ساپا جوق. ءپان كوبىنەسە ساباق كەستەسىنە سايكەس كەلمەيدى؛
- سپورت الاڭدارىنىڭ كوپشىلىگى جابدىقتالۋى مەن قاۋىپسىزدىگى جاعىنان زاماناۋي تالاپتارعا ساي ەمەس (ۇيدە جاسالعان سپورت قۇرال-جابدىعى پايدالانىلادى، قورشاۋسىز بولادى)؛
- رەسپۋبليكادا سپورت زالدارى جوق نەمەسە ستاندارتقا ساي ەمەس عيماراتتاردا ورنالاسقان مەكتەپتەر بار، ناتيجەسىندە سانيتارلىق نورمالار مەن تالاپتار بۇزىلادى. بۇل وقۋشىلاردىڭ دەنساۋلىعىنا كەرى اسەرىن تيگىزەدى.
«ەلىمىزدىڭ مەكتەپتەرىندە 30 مىڭنان استام دەنە شىنىقتىرۋ ءپانىنىڭ ءمۇعالىمى بار. ولار 175 مىڭنان استام سىنىپ جيناعىندا جۇمىس ىستەيدى. بۇل اپتاسىنا شامامەن 528 مىڭ ساعات، ياعني ءار ءمۇعالىم ءبىر ستاۆكادان ارتىق جۇمىس ىستەي الادى»، - دەدى ۆەدومستۆودان.
بۇعان دەيىن قازاقستاندىق سالالىق ءبىلىم جانە عىلىم قىزمەتكەرلەرى كاسىپوداعى دەنە شىنىقتىرۋ ءپانىن وقىتۋدا سىنىپتى توپتارعا بولمەۋ جۇمىس ىستەيتىن پەداگوگتار سانىنىڭ قىسقارۋىنا اكەلەتىندىگىن ايتىپ، دابىل كوتەرگەن بولاتىن. وسى جايتقان وراي ق ر وقۋ-اعارتۋ ءمينيسترى اسحات ايماعامبەتوۆ تە پىكىر بىلدىرگەن ەدى.