ساربازدار ۇيلەرىنە جول تارتتى
وتان الدىنداعى اسكەري بورىشىن وتەۋ – ءاربىر ەردىڭ ازاماتتىق بورىشى. ۇلتتىق ۇلاننىڭ الماتى قالاسىندا ورنالاسقان 5571 اسكەري ءبولىمى ءبىر جىل بويى اسكەري قىزمەتىن وتەگەن ساربازداردى اسكەري مىندەتتىلىكتەن بوساتىپ، وتباسىلارىنا سالتاناتتى تۇردە شىعارىپ سالدى.
اتالعان اسكەري بولىمدە 2023 جىلدىڭ ەكىنشى شاقىرىلىمى بويىنشا وزگە وبلىستاردان كەلگەن 600-دەن استام جاۋىنگەر وتان الدىنداعى بورىشتارىن ابىرويمەن اتقاردى.
– سىزدەر ءوز مىندەتتەرىڭىزدى ادال ورىنداپ، باتىلدىق تانىتتىڭىزدار، اسكەري قىزمەتتىڭ بارلىق اۋىرتپالىعىن تاباندىلىقپەن كوتەردىڭىزدەر. ەلىمىزدىڭ العا ۇستاسا – ايبارى، قولعا ۇستاسا نايزاسى سىزدەرسىزدەر! وسى اسكەري ومىردەن العان تالىم-تاربيەلەرىڭىز الداعى ازاماتتىق ومىرلەرىڭىزگە سەپتىگىن تيگىزەتىنىنە سەنىمدىمىن، – دەدى بريگادا كومانديرى پولكوۆنيك ماقسات بايماعۇلوۆ.
بۇل كۇنى جاۋىنگەرلەر ءۇشىن ءوز ۇيىندەي بولىپ كەتكەن كازارمانىڭ الدىنداعى الاڭعا اسكەري ءبولىمنىڭ بارلىق جەكە قۇرامى سالتاناتتى ساپ تۇزەپ، ءىس-شاراعا تولىق قاتىستى. ساپ تۇزەگەن الاڭنىڭ الدىڭعى شەبىنىڭ قارسى بەتىندەگى مىنبەردە اسكەري بولىمدە ۇزاق جىل ەڭبەك ەتىپ زەينەتكە شىققان ازاماتتار دا تۇردى. ولاردىڭ بارلىعى دا ءوز ۇيلەرىنە اتتانعالى تۇرعان ساربازدارعا ءسات-ساپار تىلەپ، اقجولتاي نيەتتەرىن جاۋدىردى.
سونىمەن قاتار، ۇلتتىق ۇلان جاۋىنگەرلەرى قوعامدىق ءتارتىپتى قاداعالاۋ قىزمەتىندە پوليسيا دەپارتامەنتىنىڭ وكىلدەرىمەن تىزە قوسا ەڭبەك ەتەتىندىكتەن، قۇقىق قورعاۋ ورگاندارىنىڭ جەتەكشىلەرى دە قىزمەت بارىسىندا ءوزىن ۇلگىلى ەتىپ كورسەتكەن ساربازداردى ماراپاتتاۋعا كەلگەن بولاتىن.
اتاپ ايتقاندا، قالا كوشەلەرىندەگى قوعامدىق ءتارتىپتى قامتاماسىز ەتۋ بارىسىندا ايرىقشا قىراعىلىعىمەن كوزگە تۇسكەن ساربازدارعا قولباسشىسى گەنەرال-مايور تالاپكەر امىرەيەۆ پەن ءبولىم كومانديرى پولوكۆنيك ماقسات بايماعۇلوۆتىڭ اتىنان العىس حات، كومانديرلىك ساعات سىندى باعالى سىيلىقتار جانە اسكەري ءبولىمنىڭ جازىلىپ قويىلعان جاۋىنگەرلىك تۋى جانىندا ەستەلىككە تۇسكەن سۋرەتتەرى تابىس ەتىلدى.
سونداي-اق، جيىن اياسىندا ارداگەرلەر اتىنان ءسوز العان زاپاستاعى مايور بەرىك الماعامبەتوۆ جالىندى تىلەگىن جەتكىزىپ، قىزمەتىندە بىلىكتىلىگىمەن ەرەكشە كوزگە تۇسكەن جاۋىنگەرلەرگە «وتان قورعاۋشىنىڭ اناسى» ءتوس بەلگىسىن تابىستادى.