جاز باستالىسىمەن ادامداردىڭ كوبى ساياباقتار، جاعاجايلار، باسسەيندەر، ءتۇرلى دەمالىس ايماقتارىنا قاراي اعىلادى. وتباسىلىق دەمالىسقا شىعاتىندار نەمەسە جاقىن تانىستارىمەن باسقوسۋلار ۇيىمداستىراتىندار مۇنداي كەزدە قالتاعا سالماق تۇسپەس ءۇشىن كوبىنە تاماقتى وزىمەن بىرگە دايىنداپ الا بارعاندى ءجون كورەدى. ال وسى سالادا كاسىبىن دوڭگەلەتىپ وتىرعاننان كەيىن كاسىپكەرلەر كوبىنەسە كەلۋشىلەر ءۇشىن بار جاعدايدى جاساپ، ءتۇرلى اس ءمازىرى كورسەتىلگەن ءوز تاعامىن ۇسىنادى. كەلۋشىلەردىڭ وزىمەن اكەلگەن تاعامدارىن، ءتىپتى سۋسىندى دەمالىس ايماعىنا كىرگىزۋگە رۇقسات ەتپەي جاتادى. وسىنداي كەزدە كوپشىلىك مۇنىڭ قانشالىقتى زاڭدى نەمەسە زاڭسىز ەكەنىن بىلمەي جاتادى.
جالپى ەرەجە: نەگە رۇقسات، نەگە تىيىم؟
بۇل سۇراقتىڭ جاۋابىن ق ر ساۋدا جانە ينتەگراسيا مينيسترلىگىنىڭ رەسمي وكىلى تويگۇل جۇبانيسوۆادان بىلدىك. ونىڭ ايتۋىنشا، قازاقستان زاڭناماسىنا سايكەس، ءاربىر كاسىپكەر ءوز بيزنەسىنىڭ ىشكى ەرەجەسىن ورناتۋعا قۇقىلى.
"بۇل دەگەنىمىز — كاسىپكەر ءوز اۋماعىنا تاماق الىپ كىرۋگە رۇقسات بەرۋى دە، تىيىم سالۋى دا مۇمكىن. الايدا بۇل شەكتەۋلەر زاڭدى تۇردە الدىن الا ايتىلۋى كەرەك"
تاماق الىپ كىرۋگە بولادى، ەگەر:
• بيلەت ساتىپ الاردا ەشقانداي تىيىم تۋرالى ايتىلماسا؛
• كىرەبەرىستە، كوزگە كورىنەتىن جەردە ەرەجەلەر جازىلىپ تۇرماسا؛
• قىزمەت كورسەتۋشى سىزبەن شارت جاساسپاس بۇرىن تالاپتاردى تۇسىندىرمەسە.
مۇنداي جاعدايدا ءسىز دەمالىس ايماعىنا ءوز تاماعىڭىزدى الىپ كىرە الاسىز. ەگەر كەيىننەن سىزگە «تاماقپەن كىرۋگە بولمايدى» دەپ ايتسا — بۇل زاڭسىز ارەكەت بولىپ سانالادى.
تاماق الىپ كىرۋگە بولمايدى، ەگەر:
• بيلەت ساتىپ الاردا قىزمەت كورسەتۋشى:
• «سىرتتان تاماق الىپ كىرۋگە بولمايدى» دەپ الدىن الا ەسكەرتسە؛
• بۇل تالاپتى جازباشا كەلىسىمشارتقا ەنگىزسە؛
• كىرەبەرىستە كورنەكى حابارلاندىرۋ ورناتسا.
مۇنداي جاعدايدا ءسىزدىڭ دەمالىس ورنىنىڭ ەرەجەسىنە باعىنۋىڭىز — زاڭدى تالاپ.
بۇل قانداي كەلىسىم؟
بۇل — جاريا وفەرتا نەمەسە اۋىزشا/جازباشا كەلىسىمشارت. ءسىز بيلەت الىپ، دەمالىس ورنىنا كىرگەن كەزدە سول ورىنداعى تالاپتارمەن كەلىسەسىز. ەگەر تالاپتار الدىن الا ايتىلسا — ولار زاڭدى كۇشكە يە بولادى.
بۇنداي تىيىم نە سەبەپتى بولۋى مۇمكىن؟
1. سانيتارلىق قاۋىپسىزدىك – سىرتتان كەلگەن تاعامنان ۋلانۋ بولعان جاعدايدا، كىم كىنالى ەكەنىن دالەلدەۋ قيىن.
2. كوممەرسيالىق سەبەپتەر – كاسىپكەردىڭ ءوز اسحاناسى، ءدامحاناسى بولسا، ول ءسىزدىڭ سول جەردە تاماقتانعانىڭىزدى قالايدى.
3. جاۋاپكەرشىلىكتەن باس تارتۋ – سىرتتان كەلگەن تاعام ساپاسىنا كاسىپكەر جاۋاپ بەرە المايدى.
تۇتىنۋشى قۇقىعى:
• تۇتىنۋشى بارلىق شارتتارمەن الدىن الا تانىسۋعا قۇقىلى.
• ەگەر شارتتار الدىن الا ايتىلماسا، كەيىن قويىلعان تالاپتار كۇشىن جويعان بولىپ سانالادى.
• كەز كەلگەن جاعدايدا تۇتىنۋشىنى شاتاستىرۋعا نەمەسە الداۋعا جول بەرىلمەۋى كەرەك.
ساياباق، باسسەين، كلۋب نەمەسە دەمالىس بازاسىنا وزىڭىزبەن بىرگە تاماق اپارعىڭىز كەلسە، بيلەت الار كەزدە ەرەجەلەردى ناقتىلاپ العان ءجون. ەگەر سىزگە ەشقانداي شەكتەۋ ايتىلماسا جانە جازباشا تۇردە كورسەتىلمەسە – ءوز تاماعىڭىزدى الىپ كىرۋگە قۇقىلىسىز.