دومبىرادا كۇي ورىنداپ، ونىسىنا "قازاقستان" دەپ اتاۋ بەرگەن اۋستراليالىق ازاماتتىڭ ۆيدەوسى جەلىدە جەلدەي ەستى. ۇلتتىق اسپاپتا شەبەر ويناپ، اۆتورلىق كۇي شىعارعان شەتەلدىكتىڭ ونەرىنە كوپشىلىك ءتانتى بولىپ، جىلى پىكىرلەرىن جاۋدىرىپ جاتىر. تالايدى تاڭداي قاقتىرعان جان كىم؟ اqshamnews.kz ءتىلشىسى دومبىرامەن كۇي شىعارعان مارك يستونمەن سۇحباتتاسىپ، اڭگىمەسىن تىڭدادى.
سۋرەت: كەيىپكەردىڭ جەكە ارحيۆىنەن
قازاق كۇيىنە عاشىق بولعان اۋستراليالىق مۋزىكانت
مارك يستون - اۋستراليالىق مۋزىكانت. ونەردەن بولەك كولىك جوندەۋمەن دە اۋەستەنەدى. ءبىراق ونى كوپشىلىككە تانىمال ەتكەن قازاقتىڭ ۇلتتىق اسپابى دومبىراعا دەگەن ىقىلاسى بولدى.
"دومبىرانى العاش رەت وسىدان ءتورت جىل بۇرىن ىشكى موڭعوليانىڭ حيەۆي-مەتال توبىنان ەستىدىم. سويتسەم، ولار قازاقتىڭ دومبىراسىن قوسىپ وينايدى ەكەن. ءۇنى ەرەكشە ادەمى. ىزدەنىپ كورىپ ەدىم، ونىڭ اتاۋى - دومبىرا ەكەنىن ءبىلدىم. سول كەزدە ULYTAU، HASSAK، TURAN ETHNO GROUP سياقتى قازاق توپتارىنىڭ مۋزىكاسىن تىڭداپ عاشىق بولدىم"، - دەيدى ول.
العاشقى اسەردەن كەيىن ول بىردەن دومبىرا ساتىپ الۋدى ويلاعان.
"ۆيرتۋوز دومبىراشىلاردىڭ ورىنداۋىن جەلىدەن كورىپ، شابىتتانىپ كەتتىم. سودان سوڭ دومبىرانى الدىمەن ءوز بەتىمشە ۇيرەنە باستادىم. كەيىن جەرگىلىكتى قازاقتاردان جەكە ساباق الا باستادىم. ءبىراق كوپ ساباق السام، ءوز ءستيلىمدى جوعالتىپ الام با دەپ قورىقتىم. سەبەبى مەن روك باعىتىندا وينايمىن. سوندىقتان ءوز ەرەكشەلىگىمدى ساقتاعىم كەلدى"، - دەيدى مارك.
عالاماتقا ارنالعان "عالامات تۋىندى"
مارك دومبىراعا ءوزىنىڭ باتىستىق ءستيلىن قوسىپ، قازاق كۇيىنە جاڭا باعىت ۇسىنعان ادام. ول العاشقى كۇيىن بەلگىلى دومبىراشى عالامات بەيسەقوجانىڭ ورىنداۋىنان شابىتتانىپ جازعان.
"مەن عالامات دەگەن جىگىتتى كەزدەستىردىم. ول كەرەمەت كومپوزيتور ءارى دومبىراشى. ونىڭ قالاي وينايتىنىن كورىپ، تاڭعالدىم. سول ساتتە ءوزىم دە ءبىر كۇي جازىپ كورۋگە بەل بۋدىم. العاشىندا كۇيدى عالاماتتىڭ اتىمەن اتاعىم كەلدى. ءبىراق شەتەلدىكتەر، ونىڭ ىشىندە ءوزىم دە، ەسىمىن دۇرىس ايتا الماي قالارمىز دەپ، كۇيدىڭ اتىن "قازاقستان" دەپ قويدىم"، - دەيدى مۋزىكانت.
ماركتىڭ ايتۋىنشا، "قازاقستان" كۇيى بىرنەشە فازادان تۇرادى.
"الدىمەن كۇي جاي باستالادى. سوسىن دومبىرا مەن اۋىز سىرناي قوسىلىپ وينايدى. كەيىن ىرعاعى دالاداعى تۇلپارلاردىڭ شابىسىن ەلەستەتەدى. ال ورتا تۇسىندا ازداپ تاماقپەن ءان ايتۋ تەحنيكاسىن قوستىم. بۇل - ءوزىمدى وتكەن شاققا، ورتالىق ازيا مۋزىكاسىنىڭ تۇبىنە ورالعانداي سەزىم سىيلايدى"، — دەيدى ول.
"قازاق حالقىنىڭ قوناقجايلىعىن ەشتەڭەگە تەڭەي المايمىن"
مارك دومبىرانى نەبارى ءۇش ايدا مەڭگەرىپ، العاشقى كۇيىن جازىپ شىققان. ونىڭ يكەمدىلىگىنە بۇعان دەيىن گيتارادا ەركىن ويناۋى كوپ كومەكتەسكەن ەكەن.
وسى ۋاقىتقا دەيىن مۋزىكانت قازاقستانعا ەكى رەت كەلگەن. الماتىعا كاسىبي دومبىرا الۋ ءۇشىن ارنايى ساپارمەن كەلىپ، "الماتى" اتتى ەكىنشى انىنە بەينەبايان ءتۇسىرىپ كەتكەن. سونداي-اق ول "ءلايلا-قوبىز" توبىمەن بىرگە "بۇركىتشى قىز" اتتى تۋىندى جازىپ، اربات پەن پانفيلوۆ كوشەسىندە كوشە كونسەرتتەرىن دە وتكىزگەن.
"قازاقستانعا كەلىپ جۇرگەندە كوپ اداممەن تانىستىم. بارلىعى قول ۇشىن بەرۋگە دايىن بولدى. بۇل ماعان كەرەمەت اسەر قالدىردى. شىنىمدى ايتسام، قازاقستانداعى دوستىق پەن اشىقتىق دەڭگەيى مەنى تاڭعالدىرادى. ادامدارى وتە باۋىرمال، تاماعى دا ءدامدى. "Spirit of Tengri" فەستيۆالىنە قاتىستىم - مەن كورگەن ەڭ تاماشا شارا! قازاقستانعا قايتادان بارىپ، تاعى دا مۋزىكا ورىنداعىم كەلەدى"، — دەيدى مارك.
ءقازىر ول "قازاقستان" كۇيىنە رەسمي بەينەبايان ءتۇسىرىپ جاتىر. ونىڭ ايتۋىنشا، ەندىگى ماقساتى - قازاقتىڭ ۇلتتىق اسپابى ارقىلى ءوز تىڭدارماندارىنا ورتالىق ازيانىڭ سىرلى اۋەنىن سەزىندىرۋ.
"مەن قازاق ونەرىن الەمگە تانىتقىم كەلەدى. مەنىڭ كۇيىمدى پەرۋدەن باستاپ، قازاقستانعا دەيىن تىڭداپ جاتىر. بۇل - ۇلكەن مارتەبە"، — دەيدى اۋستراليالىق كۇيشى.