دەمالىس كۇنى جۇمىس ىستەگەنى ءۇشىن قانشا تولەنۋى كەرەك؟

قۇقىمىزدى بىلە جۇرەيىك!

مەرەكە جانە دەمالىس كۇندەرىندەگى جۇمىسقا اقى تولەنۋى كەرەك.

ءبىراق ۇستەمە جۇمىستىڭ تولەنۋى نەمەسە تولەنبەۋى ۇستەمە جۇمىسقا كىمنىڭ باستاماشىسى بولۋىنان تۋىندايدى. ياعني قىزمەتكەر ءوز ەركىمەن قالىپ، جۇمىسىن اياقتاپ تاستاۋعا شەشىم قابىلدادى ما نەمەسە جۇمىس بەرۋشى قىزمەتكەرلەرىنە جۇمىستان كەيىن قالىپ، جۇمىستى اياقتاپ تاستاۋعا بۇيىردى ما سوعان بايلانىستى.

قوسىمشا جۇمىس ۋاقىتى دەگەنىمىز نەشە ساعات؟

جۇمىس ۋاقىتىنان تىس جۇمىس ىستەۋگە ۋاقىت بويىنشا شەكتەۋلەر بار. قوسىمشا جۇمىس ساعاتتارىنىڭ سانى:

ءاربىر قىزمەتكەر ءۇشىن كۇنىنە ەكى ساعاتتان اسپاۋى كەرەك؛

اۋىر جۇمىستار، ەڭبەك جاعدايلارى زياندى جانە (نەمەسە) ءقاۋىپتى جۇمىستار ءۇشىن ەڭ ۇزاق قوسىمشا جۇمىس ۋاقىتى ءبىر ساعات؛

ايىنا ءتورت، بەس جانە التى كۇندىك جۇمىس اپتاسىندا ۇستەمە جۇمىستىڭ جالپى ۇزاقتىعى 12 ساعاتتان اسپاۋى كەرەك؛

جىلىنا جالپى قوسىمشا جۇمىس ۇزاقتىعى 120 ساعاتتان اسپاۋى كەرەك.

قوسىمشا جۇمىس ۋاقىتى قالاي تولەنەدى؟

ۋاقىتشا ەڭبەكاقى تولەۋ كەزىندە ۇستەمە جۇمىسقا ەڭبەك نەمەسە ۇجىمدىق شارتتىڭ جانە/نەمەسە جۇمىس بەرۋشىنىڭ بۇيرىعىنىڭ تالاپتارىنا سايكەس جوعارىلاتىلعان ستاۆكا بويىنشا، ءبىراق قىزمەتكەردىڭ كۇندىزگى ەڭبەكاقىسى نەگىزىندە ءبىر جارىم ەسەدەن كەم ەمەس مولشەردە تولەنەدى.

ىستەلگەن جۇمىسقا ساي تولەنەتىن اقى ءۇشىن قىزمەتكەردىڭ بەلگىلەنگەن كۇندىك (ساعاتتىق) ستاۆكاسىنىڭ كەمىندە 50%-ى مولشەرىندە قوسىمشا اقى تولەنەدى.

دەمالىس جانە مەرەكە كۇندەرى جۇمىس ىستەسەڭىز قالاي تولەنەدى؟

قوسىمشا اقشا تابۋدىڭ تاعى ءبىر مۇمكىندىگى - مەرەكە جانە دەمالىس كۇندەرى جۇمىس ىستەۋ. اپتاسىنا التى كۇن جۇمىس ىستەسەڭىز سەنبى دەمالىس ەمەس، جۇمىس كۇنى ەكەنىن ەسكەرگەن ءجون.

مەرەكە جانە دەمالىس كۇندەرىندەگى جۇمىسقا اقى تولەنەدى. شارت ەڭبەك نەمەسە ۇجىمدىق شارتتا نەمەسە كاسىپورىننىڭ مەرەكە جانە دەمالىس كۇندەرىندەگى جۇمىسىنا قاتىستى جۇمىس بەرۋشىنىڭ بۇيرىعىندا كورسەتىلۋى قاجەت. ليميت – تولەم قىزمەتكەردىڭ كۇندەلىكتى (ساعاتتىق) تاريفىنە نەگىزدەلگەن سومادان ءبىر جارىم ەسەدەن تومەن بولماۋى كەرەك.

تۇندە جۇمىس ىستەسەڭىز قالاي تولەنۋى كەرەك؟

تۇنگى مەزگىلدەگى جۇمىستىڭ ءار ساعاتى جۇمىسشىنىڭ كۇندىزگى (ساعاتتىق) اقىسىنا شاققاندا ءبىر جارىم ەسەلىك ولشەمنەن كەم ەمەس مولشەردە بەرىلەدى.

ءتۇرلى بىلىكتىلىك جۇمىستارىن اتقارعان جۇمىسشى جالاقىسى الدەقايدا جوعارى بىلىكتىلىك جۇمىسى بويىنشا تولەنەدى.

جوعارى بىلىكتى جۇمىسشىعا ءوندىرىس سيپاتىنا قاراي، وعان بەرىلگەن رازريادتان تومەن جۇمىس اتقارۋ جۇكتەلسە، جالاقى وعان بەكىتىلگەن بىلىكتىلىككە (رازريادقا) قاراي تولەنەدى.

ءبىر ۇيىمدا ءوزىنىڭ نەگىزگى قىزمەتىمەن بىرگە، ەڭبەك كەلىسىم-شارتىمەن بەكىتىلىپ، ورنىندا جوق جۇمىسشىنىڭ قىزمەتىن نەمەسە مىندەتىن ءوزى قىزمەتىنە ۇستەمە رەتىندە قوسىمشا اتقارسا، ول جۇمىسشاعا ۇستەمە اقى تولەنەدى.

ۇيلەسىمدى قىزمەتكە (قىزمەت كورسەتۋ زوناسىنىڭ كەڭەيۋى) نەمەسە ۋاقىتشا ورنىندا جوق قىزمەتكەردىڭ مىندەتىن اتقارۋعا تولەنەتىن قوسىمشا اقىنىڭ مولشەرى جۇمىسشىنىڭ كەلىسىمىمەن جۇمىس بەرۋشى ارقىلى بەكىتىلەدى.

تۇنگى جۇمىس مەرەكە نەمەسە دەمالىس كۇنىنە سايكەس كەلسە، ەڭبەكاقى تۇنگى ساعاتتار ءۇشىن بولەك جانە مەرەكە نەمەسە دەمالىس كۇنى ءۇشىن بولەك جۇرگىزىلەدى.

جۇمىستاعى قوسىمشا مىندەتتەمەلەر:

ءبىر ۇيىمدا نەگىزگى جۇمىسىمەن قاتار قوسىمشا جۇمىس اتقاراتىن قىزمەتكەرلەر بۇل ءۇشىن قوسىمشا اقى الۋى ءتيىس.

قوسىمشا جۇمىستىڭ قانداي تۇرلەرى بار؟

لاۋازىمداردى بىرىكتىرۋ – قىزمەتكەر ەڭبەك شارتىندا (لاۋازىمدىلىق نۇسقاۋلىعىندا) كوزدەلگەن ءوزىنىڭ نەگىزگى جۇمىسىمەن قاتار باسقا قىزمەتكەردىڭ مىندەتتەرىن  قوسىمشا ورىنداسا؛

قىزمەت كورسەتۋ اۋقىمىن  كەڭەيتۋ – قىزمەتكەر ەڭبەك شارتىندا (لاۋازىمدىق نۇسقاۋلىقتا) كوزدەلگەن ءوزىنىڭ نەگىزگى جۇمىسىمەن قاتار جۇمىس كۇنىنىڭ (اۋىسىمىنىڭ) بەلگىلەنگەن ۇزاقتىعى ىشىندە قوسىمشا جۇمىستاردى ورىنداسا؛

ۋاقىتشا بولماعان قىزمەتكەردىڭ مىندەتتەرىن ورىنداۋ (اۋىستىرۋ) – قىزمەتكەر ءوزىنىڭ ەڭبەك شارتىندا (لاۋازىمدىق نۇسقاۋلىقتا) كوزدەلگەن نەگىزگى جۇمىسىمەن قاتار باسقا لاۋازىمداعى قىزمەتكەردىڭ  قوسىمشا جۇمىستارىن ورىنداسا.

بۇل جاعدايلاردا قوسىمشا جۇمىس ءۇشىن قوسىمشا اقى مولشەرىن جۇمىس بەرۋشى ورىنداعان جۇمىس كولەمىنە قاراي قىزمەتكەرمەن كەلىسىم بويىنشا بەلگىلەيدى.

ەسكەرە كەتەتىن جايت: ەگەر بۇل ونىڭ لاۋازىمدىق مىندەتتەرىنە كىرەتىن بولسا، ۋاقىتشا بولماعان قىزمەتكەردىڭ مىندەتتەرىن ورىنداعانى (اۋىستىرۋى) ءۇشىن قىزمەتكەرلەرگە قوسىمشا اقى تولەنبەيدى.

وزگە جاعدايلاردا قىزمەتكەر قوسىمشا جۇمىستى ورىنداۋدان باس تارتۋعا قۇقىلى، ال جۇمىس بەرۋشى قوسىمشا جۇمىس توقتاتىلعانعا دەيىن ءۇش جۇمىس كۇنىنەن كەشىكتىرمەي ەكىنشى تاراپتى حاباردار ەتە وتىرىپ، ونى ورىنداۋ تۋرالى بۇيرىقتىڭ كۇشىن جويۋعا قۇقىلى.

جۇمىس بەرۋشى قاي ۋاقىتتا از تولەۋگە قۇقىلى؟

تۇرالاۋ كەزىندە جالاقىنىڭ تومەندەۋى مۇمكىن.

ەكونوميكالىق، تەحنولوگيالىق، ۇيىمداستىرۋشىلىق، وزگە دە وندىرىستىك نەمەسە تابيعي سيپاتتاعى سەبەپتەر بويىنشا جۇمىستى ۋاقىتشا توقتاتۋ؛

توتەنشە نەمەسە سوعىس جاعدايى ەنگىزىلگەن جاعدايلاردا؛

توتەنشە جاعدايدا نەمەسە مەملەكەتتىك ورگانداردىڭ نەمەسە ولاردىڭ لاۋازىمدى ادامدارىنىڭ شەشىمى بويىنشا كارانتيندى قوسا العاندا، باسقا شەكتەۋ شارالارى ەنگىزىلگەن كەزدە.