ءۇندىستاننىڭ گوا شتاتىنداعى كۋرورتتىق ايماقتا 79 جاستاعى بريتانيالىق تۋريسكە بۇقا شابۋىل جاساعان. وقىس وقيعا بيىل 4 قاڭتاردا بولعان، - دەپ حابارلايدى اlmaty-akshamy.kz.
زارداپ شەككەن تۋريست، 79 جاستاعى بريتانيالىق يۆون مورريش وقيعانىڭ ءمان-جايىن بايانداپ بەردى. ايتۋىنشا، 2 قاڭتاردا ول گواعا كەلىپ، بەناۋليم قوناقۇيىنە جايعاسقان. دەمالىسىنىڭ ءار كۇنىن جاعاجايداعى سەرۋەنمەن باستاپ جۇرگەن ول 4 قاڭتاردا وقىس وقيعاعا تاپ بولعان. بەلگىلى بولعانداي، جاعاجايدا جايىلىپ جۇرگەن بۇقاعا يت شابۋىل جاساپ، سالدارىنان بۇقا ويقاستاپ جۇگىرە جونەلگەن.
وكىنىشكە قاراي، اشۋعا بۋلىققان بۇقا الدىنان كەزىككەن ءمورريشتىڭ سانىن ءسۇزىپ وتكەن. سالدارىنان ول وڭباي قۇلاپ، اياعى مەن باسىن جاراقاتتاپ الادى. باسىلىم اتاپ وتكەندەي، قۇتقارۋشىلاردىڭ ءبىرى ءتۋريستى اراشالاپ الماق بولىپ ءجۇرىپ، بۇقاعا ءوزى دە سوقتىعىسقان كورىنەدى. دەگەنمەن قۇتقارۋشىنىڭ قازىرگى جاعدايى بەلگىسىز.
كۋاگەرلەر جاقىن ماڭداعى ءدامحانا قىزمەتكەرلەرىنىڭ كومەگىمەن جەدەل جاردەم شاقىرتقان. ال جەرگىلىكتى تۇرعىندار ءتۋريستى جاعاجايدان باستى جولعا جەتكىزىپ بەرگەن. ءسويتىپ جەدەل جاردەم قىزمەتى ونى وڭتۇستىك گوا اۋداندىق اۋرۋحاناسىنا جاتقىزعان.
كولۆا پوليسياسىنىڭ باسشىسى ساندەش گادكەر اۋرۋحاناعا بارىپ، زارداپ شەككە ءتۋريستىڭ جاعدايىن ءبىلدى. ءقازىر پوليسيا ءتۋريستى ءسۇزىپ تاستاعان بۇقا يەسىن ىزدەستىرىپ جاتىر.