گەرمانيا ەلىندە ءار پتر-تەستتىڭ ناتيجەسى كوروناۆيرۋستىڭ جاڭا شتامىن انىقتاۋ ءۇشىن تاعى ءبىر مارتە تەكسەرىلەتىن بولادى. بۇل ناۋقاستا ءقاۋىپتى ىندەتتىڭ ءۇندىستاندىق نۇسقاسىن انىقتاۋ ءۇشىن قاجەت. دۇنيەجۇزىلىك دەنساۋلىق ساقتاۋ ۇيىمى ونى «دەلتا ۆيرۋس» دەپ اتادى. ۆيرۋستىڭ بۇل ءتۇرى وزگەلەرگە قاراعاندا تەز تارايدى. ماسەلەن، ۇلىبريتانيادا «دەلتا ۆيرۋس» جاڭادان تىركەلگەن دىمكاس جانداردىڭ 96%-ىندا تابىلسا، گەرمانيادا 6% ناۋقاستا انىقتالعان. سونىڭ وزىندە نەمىس ساراپشىلارى الدەن دابىل قاعا باستادى. جەرگىلىكتى بيلىك ايماقتاعى ەپيداحۋالدىڭ وڭالعانىنا قاراماستان شەكتەۋ شارالارىن جەڭىلدەتۋگە اسىعار ەمەس. كەڭسەلەر مەن مەكتەپتەردە ءالى دە بەتپەردە رەجيمى ساقتالعان. ويتكەنى، ساراپشىلار كۇزگە قاراي ايماقتا «دەلتا» ءورشىپ كەتۋى مۇمكىن دەپ الاڭداۋلى.
مالايزيا مەملەكەتىندە ەكپە ەگۋ ناۋقانىن مەيلىنشە ۇدەتە ءتۇسۋ ءۇشىن كۋالا-لۋمپۋردەگى ۇلتتىق ستاديون دا ۋاقىتشا ۆاكسينالاۋ ورتالىعىنا اينالعان. ءقازىر كۇن سايىن تۇرعىندارعا 200 مىڭ دوزا سالىنىپ جاتقان كورىنەدى. وسىلايشا جەرگىلىكتى بيلىك شىلدەنىڭ سوڭىنا قاراي حالىقتىڭ 10%-ىن ەگىپ شىقپاق.
ءۇندىستان – الەمدەگى ەڭ ءىرى ۆاكسينا وندىرۋشىلەردىڭ ءبىرى. الايدا، ونىڭ ءوزىنىڭ ۆاكسينالاۋ بويىنشا كامپانياسى باياۋ قارقىنمەن جۇرۋدە. سوندىقتان ەل بيلىگى حالىقتىڭ ەرەسەك بولىگىنىڭ بارلىعىنا كوروناۆيرۋسقا قارسى تەگىن ۆاكسينا سالۋدى كوزدەيتىن جاڭا ساياساتتى قولعا الدى. ياعني فەدەرالدى ۇكىمەت ەلدە وندىرىلەتىن ۆاكسينالاردىڭ 75%-ىن ساتىپ الىپ، ءۇندىستان شتاتتارى اراسىندا بولەتىن بولادى. جەرگىلىكتى دەنساۋلىق ساقتاۋ مينيسترلىگىنىڭ دەرەگى بويىنشا، ۆاكسينالاۋ بويىنشا جاڭا ستراتەگيانىڭ ىسكە اسىرىلۋىنىڭ ءبىرىنشى كۇنى ءۇندىستاندا 8،4 ميلليون ادامعا ەكپە سالىنعان. سونىڭ وزىندە قازىرگى كەزدە حالقىنىڭ 5%-ى عانا پايىزى ۆاكسينا العان، كوپتەگەن شتاتتاردا ۆاكسينا ءالى دە تاپشى كورىنەدى.
پەرۋ جەرىندە كوروناۆيرۋستىڭ «دەلتامەن» دەڭگەيلەس جاڭا شتامى باس كوتەرىپتى. ماماندار وسىلاي دەپ دابىل قاقتى. بۇعان دەيىن دۇنيەجۇزىلىك دەنساۋلىق ساقتاۋ ۇيىمىنىڭ وكىلدەرى و سىعان دەيىن عىلىمي دالەلدەنگەن ۆاكسينالاردىڭ ءبارى «ءۇندى» شتامىنا قارسى تۇرا الاتىندىعىن ايتقان بولاتىن. ول ءۇشىن ەكپەنىڭ ەكى دوزاسىن دا الۋ مىندەتتى. ەندى الگى شتامعا دا توتەپ بەرە الادى دەپ تىلەيىك.