قازاقستاندىقتار وزىنە جۇمساي الاتىن قاراجات دەلدال كومپانيالاردىڭ قالتاسىنا كەتىپ جاتىر
مەملەكەت بيزنەسكە جۇكتەگەن كەيبىر قوسىمشا شىعىندى كاسىپكەرلەردىڭ حالىقتان ءوندىرىپ الاتىنى جاسىرىن ەمەس. بۇل تۋرالى ۇكىمەتتىڭ كەڭەيتىلگەن وتىرىسىندا ق ر پرەزيدەنتى قاسىم-جومارت توقايەۆ ايتتى، دەپ حابارلايدى اlmaty-akshamy.kz قازاقپاراتقا سىلتەمە جاساپ..
«مەملەكەت بيزنەسكە جۇكتەگەن كەيبىر قوسىمشا شىعىنداردى كاسىپكەرلەردىڭ حالىقتان ءوندىرىپ الاتىنى جاسىرىن ەمەس. ءسوز مونوپوليالىق وپەراتورلاردىڭ ءتۇرلى دەلدالدارىنىڭ، قاجەتسىز اگەنتتەرىنىڭ كوميسسياسى مەن تاريفتەرى جايىندا بولىپ وتىر. بۇل پروبلەمانى بىلەسىزدەر. سۇراق - ولاردىڭ قىزمەتىن كىم تولەيدى؟ ارينە، تۇتىنۋشى تولەيدى. وعان قابىلدانعان زاڭدار مەن قاۋلىلار كىنالى»، - دەدى ق ر پرەزيدەنتى.
قاسىم-جومارت توقايەۆتىڭ ايتۋىنشا، مۇنداي جايتقا مەملەكەتتىك ورگاندار قوعامنىڭ ەمەس، جەكەلەگەن كومپانيالاردىڭ مۇددەسىن باسشىلىققا الىپ قابىلداعان نورماتيۆتىك-قۇقىقتىق اكتىلەر سەبەپ بولعان.
«قازاقستاندىقتار وزىنە جۇمساي الاتىن قاراجات اتالعان كومپانيالاردىڭ قالتاسىنا كەتىپ جاتىر. ۇكىمەتكە بۇل ماسەلەگە بارىنشا بايىپپەن نازار اۋدارۋ تاپسىرىلادى جانە «اتامەكەن» پالاتاسىمەن بىرلەسىپ، ءاربىر جاعدايدى ءجىتى پىسىقتاپ، ونى تۇزەتۋدىڭ ناقتى شەشىمدەرىن ۇسىنۋى ءتيىس»، - دەدى مەملەكەت باسشىسى.