بۇل تۋرالى الماتى اكىمى ەربولات دوسايەۆ ۇكىمەتتىڭ كەڭەيتىلگەن وتىرىسىندا ءمالىم ەتتى.
مەملەكەت باسىشىسىنىڭ قاتىسۋمەن وتكەن ۇكىمەتتىڭ كەڭەيتىلگەن وتىرىسىندا الماتى اكىمى ەربولات دوسايەۆ قالا حالقىنىڭ ءومىر ساپاسىن ارتتىرۋ مەن الەۋمەتتىك ينفراقۇرىلىمدى دامىتۋ جۇمىستىڭ باسىمدىق بەرىلگەن باعىتى ەكەنىن اتاپ ءوتتى، دەپ حابارلايدى Almaty-akshamy.kz
«قالا حالقى سانىنىڭ ءوسۋى اياسىندا وقۋشىلار ورنىنىڭ جەتىسپەۋشىلىگى كۇردەلى ماسەلە بولىپ وتىر. وتكەن جىلى الماتىدا 33 جاڭا مەكتەپ ىسكە قوسىلدى، ونىڭ 6-ۋىندا 15 719 جاڭا وقۋشى ورنىن اشىلىپ، سونىڭ ارقاسىندا ورىن تاپشىلىعىن 46 پايىزعا ازايتۋ مۇمكىن بولدى. بيىلعى جىلدىڭ 1 قاڭتارىنداعى جاعداي بويىنشا قالادا 19 611 وقۋشى ورنى جەتىسپەيدى»، - دەپ اتاپ ءوتتى قالا اكىمى.
بۇل ماسەلەنى شەشۋ ماقساتىندا 2022 جىلى 46 ورتا ءبىلىم بەرۋ نىسانىنىڭ قۇرىلىسى جالعاسادى، ونىڭ ىشىندە 14245 ورىندىق 22 نىسان جىل سوڭىنا دەيىن پايدالانۋعا بەرىلەدى.پرەزيدەنت ق.توقايەۆ جاريالاعان بالالار جىلى اياسىندا بالاباقشا كەزەگىن ازايتۋ ءۇشىن الماتىدا 10 340 ورىندىق 82 مەكتەپكە دەيىنگى مەكەمە اشۋ جۇمىستارى باستالدى. ءقازىردىڭ وزىندە 2022 جىلى 6560 ورىندىق 60 جەكەمەنشىك بالاباقشا مەن 2 مەملەكەتتىك بالاباقشا اشۋ جوسپارلانۋدا. سونداي-اق بالالارعا قوسىمشا ءبىلىم بەرۋ ءۇشىن مەملەكەتتىك تاپسىرىس 73 147 ورىنعا كەڭەيتىلىپ، 2 زاماناۋي يننوۆاسيالىق شىعارماشىلىق ورتالىعىنىڭ قۇرىلىسى، 4 وقۋشى ءۇيىن جاڭعىرتۋ جۇمىستارى باستالادى.
«بۇگىندە 207 مەملەكەتتىك مەكتەپتىڭ بارلىعى قاۋىپسىزدىك تالاپتارىنا سايكەس كەلمەيدى. ءبىلىم بەرۋ ۇيىمدارىندا قاۋىپسىزدىكتى قامتاماسىز ەتۋ ءۇشىن ءبىز وسى ناۋرىز ايىندا 2 جىلدىق باعدارلامانى قابىلداۋعا نيەتتىمىز، ونى ىسكە اسىرۋ ناتيجەسىندە 2023 جىلدىڭ 1 قىركۇيەگىنە دەيىن قالانىڭ بارلىق مەكتەپتەرىندە بەينەباقىلاۋ كامەرالارىن اۋىستىرۋ، تۋرنيكەتتەر مەن دابىل تۇيمەلەرىن ورناتۋ ماسەلەلەرى تولىق شەشىلەتىن بولادى»، - دەدى ەربولات دوسايەۆ.