دەكلاراسيا تاپسىرۋدان جالتارعان مەملەكەتتىك قىزمەتكەرلەر

39 مىڭ فاكت انىقتالعان.

مەملەكەتتىك كىرىستەر كوميتەتىنىڭ ءتوراعاسى دانيار ءجانالىنوۆتىڭ ايتۋىنشا، قىزمەتكەرلەر اراسىندا 2021 جىلعى تابىس دەكلاراسياسىن تاپسىرۋدان جالتارۋدىڭ 39 مىڭ فاكتىسى انىقتالدى، دەپ حابارلايدى Almaty-akshamy.kz

قازاقستاندا جالپىعا بىردەي تابىس دەكلاراسياسىن كەزەڭ-كەزەڭىمەن ەنگىزۋگە شەشىم قابىلدانعان بولاتىن. الدىمەن مەملەكەتتىك قىزمەتكەرلەر 2021 جىلعى ەسەبىن تاپسىرۋعا مىندەتتى.

«570 مىڭنان استام دەكلاراسيا ءتۇستى. الايدا دەكلاراسيانى تاپسىرماۋ فاكتىلەرى دە بولدى. ونداي ادامداردىڭ سانى 39 مىڭ بولعان. بارلىعىنا ءتيىستى ەسكەرتۋلەر جىبەرىلگەن. سونىڭ ناتيجەسىندە 10 مىڭ ادام تابىس دەكلاراسياسىن تاپسىردى»، - دەدى ءجانالىنوۆ ورتالىق كوممۋنيكاسيالار قىزمەتىندە وتكەن بريفينگتە.

ونىڭ ايتۋىنشا، قازىرگى كەزدە قالعان 29 مىڭ ادامنىڭ دەكلاراسيانى نە سەبەپتى تاپسىرماعانى انىقتالىپ جاتىر. ولار دا تۇسىنىكتەمە بەرۋى ءتيىس. تابىس دەكلاراسياسىن تاپسىرماعان مەملەكەتتىك قىزمەتكەرلەردىڭ اراسىندا جۇمىستان شىعىپ كەتكەن ادامادار دا بولۋى مۇمكىن. ءبىراق ولار تۋرالى مالىمەتتەر كوميتەتتە قالا بەرەدى.

«ايىپپۇلدار سالىنباعان، بارلىعىنا ەسكەرتۋ تۇرىندە اكىمشىلىك شارا قولدانىلدى»، – دەپ اتاپ كورسەتتى ءجانالىنوۆ.

ايتا كەتەرى، تابىس پەن مۇلىك تۋرالى دەكلاراسيا تاپسىرۋ شارالارى مەملەكەتتىك قىزمەتكەرلەر مەن ولاردىڭ جۇبايلارىنان باستالعان. 2023 جىلى مەملەكەتتىك كاسىپورىنداردا (ءبىلىم بەرۋ، دەنساۋلىق ساقتاۋ، مادەنيەت، سپورت) ىستەيتىن قىزمەتكەرلەر مەن ولاردىڭ جۇبايلارى دەكلاراسيا تاپسىرۋعا مىندەتتەلەدى.