دۇنيەجۇزىلىك دەنساۋلىق ساقتاۋ ۇيىمى NATURCOLD پرەپاراتىنىڭ قاۋىپتىلىگى تۋرالى ەسكەرتەدى.
بۇل ءدارى قازاقستان رەسپۋبليكاسىندا تىركەلمەگەن، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بۇقارالىق اقپارات قۇرالدارىندا ءۇندىستاننىڭ دەنساۋلىق ساقتاۋ مينيسترلىگى جوتەلگە قارسى سيروپ شىعاراتىن Riemann Labs فارماسيەۆتيكالىق كومپانياسىنىڭ قىزمەتىنە تىيىم سالعانى تۋرالى اقپارات تارادى. كامەرۋنداعى بالالار وسى سيروپتىڭ سالدارىنان قايتىس بولۋى مۇمكىن دەپ كۇدىكتەنەدى. كومپانيانىڭ ليسەنزيا ءنومىرى NATURCOLD پرەپاراتىنىڭ قاپتاماسىنداعى ليسەنزيا نومىرىنە سايكەس كەلەدى. ايتا كەتەيىك، NATURCOLD قازاقستان رەسپۋبليكاسىندا تىركەلمەگەن، سونداي-اق كوتەرمە جانە بولشەك ساۋدا سەگمەنتىندە ساتىلمايدى»، - دەلىنگەن كوميتەت اقپاراتىندا.
سونداي-اق، بۇل سيروپتىڭ قۇرامىنداعى مالىمدەلگەن بەلسەندى زاتتار – پاراسەتامول، فەنيلەفرين گيدروحلوريدى جانە حلورفەنيرامين مالەاتى. اقپاراتقا سايكەس، بۇل زاتتار ءارتۇرلى كومبيناسيالاردا سۋىق تيۋ، تۇماۋ جانە اللەرگيالىق رينيت بەلگىلەرىن جەڭىلدەتۋ ءۇشىن قولدانىلادى.
«دۇنيەجۇزىلىك دەنساۋلىق ساقتاۋ ۇيىمىنىڭ رەسمي مالىمەتتەرى بويىنشا، 2023 جىلدىڭ 27 ماۋسىمىندا كامەرۋننان NATURCOLD سيروپىنىڭ ۇلگىلەرى ددسۇ-نا بەرىلدى جانە زەرتحانالىق زەرتتەۋلەردەن ءوتتى. ۇلگىلەردى زەرتحانالىق تالداۋ پرەپاراتتىڭ جول بەرىلمەيتىن جوعارى كونسەنتراسيادا ديەتيلەنگليكولمەن لاستانعانىن كورسەتتى. NATURCOLD سيروپىنىڭ ۇلگىلەرىندەگى ديەتيلەنگليكولدىڭ ۇلەسى 28،6%-عا جەتتى. ديەتيلەنگليكولدىڭ شەكتى رۇقسات ەتىلگەن كونسەنتراسياسى 0،10%-دان اسپايدى.
ديستريبيۋتور پرەپاراتتىڭ قاپتاماسىندا - FRAKEN INTERNATIONAL (انگليا) كورسەتىلگەن. الايدا، ۇلىبريتانيانىڭ ۇلتتىق رەتتەۋ ورگانى (MHRA) بۇل اتاۋمەن ءوندىرۋشى ۇلىبريتانيادا تىركەلمەگەنىن راستادى. قازىرگى ۋاقىتتا پرەپاراتتىڭ شىعۋ تەگىن انىقتاۋ ماقساتىندا تەرگەۋ جۇرگىزىلىپ جاتىر.
ددۇ ىشكەن كەزدە ديەتيلەنگليكول ادامدار ءۇشىن ۋلى ەكەنىن جانە ولىمگە اكەلۋى مۇمكىن ەكەنىن ەسكەرتەدى.
سونىمەن قاتار، كونديسيونەرلەنبەگەن لاستانعان ونىمدەر پاسيەنتتىڭ دەنساۋلىعىنا، اسىرەسە بالالاردى ەمدەۋدە ۇلكەن زيان كەلتىرۋى، سونىمەن قاتار ولىمگە اكەلەتىن ۋلانۋدى تۋدىرۋى مۇمكىن.
NATURCOLD دارىلىك پرەپاراتى تابىلعان جاعدايدا رەسپۋبليكا بويىنشا زاڭناماعا سايكەس ءتيىستى اكىمشىلىك شارالار قابىلداناتىن بولادى»، - دەلىنگەن ۆەدومستۆو حابارلاماسىندا.