ىندەتتىڭ بەتى قايتىپ جاتىر
دۇنيەجۇزىلىك دەنساۋلىق ساقتاۋ ۇيىمى (ددۇ) تاراتقان مالىمەتكە ساي، ۆيرۋس جۇقتىرۋ جاڭا وقيعالارىنىڭ سانى الدىڭعى اپتامەن سالىستىرعاندا 2 پايىزعا، ال ودان بولعان ءولىم وقيعالارى 9 پايىزعا قىسقاردى، دەپ حابارلايدى Almaty-akshamy.kz سoronavirus2020.kz سايتىنا سىلتەمە جاساپ.
وتكەن اپتانىڭ ىشىندە الەم بويىنشا 4،1 ملن استام ادام كوروناۆيرۋس جۇقتىرىپ، 44 مىڭنان استامى قايتىس بولدى.
ددۇ-نىڭ اپتا سايىنعى ەپيدەميولوگيالىق بيۋللەتەنىندە كەلتىرىلگەن ستاتيستيكالىق مالىمەت بويىنشا، 13-19 جەلتوقسان ارالىعىندا ءقاۋىپتى ۆيرۋس جۇقتىرعان 4 177 622 ادام انىقتالىپ، 44 616 ءولىم وقيعاسى انىقتالدى. بۇل الدىڭعى اپتاعا قاراعاندا، تيىسىنشە 2 جانە 9 پايىزعا از.
سونىمەن بىرگە، افريكادا كوروناۆيرۋس جۇقتىرۋدىڭ (53 پايىز) جانە ودان بولعان ءولىم وقيعالارى سانىنىڭ (15 پايىز) ايتارلىقتاي ءوسىمى تىركەلدى. افريكادان باسقا، اۋرۋ جۇقتىرۋ دەڭگەيى باتىس-تىنىق مۇحيتى ايماعىندا دا وسكەن (12 پايىز).
ءقاۋىپتى ۆيرۋسكە شالدىعۋ وقيعالارىنىڭ 63 پايىزى ەۋروپادا تىركەلگەن، ال ودان بولعان ءولىم وقيعالارى 60 پايىزدى قۇراپ وتىر.
سونىمەن بىرگە، وندا اۋرۋ جۇقتىرۋ دەڭگەيى 3 پايىزعا، ال ءولىم-جىتىم دەڭگەيى 7 پايىزعا قىسقارعان. امەريكادا كوروناۆيرۋس جۇقتىرۋ جاڭا وقيعالارىنىڭ سانى 10 پايىزعا، ال وڭتۇستىك-شىعىس جانە شىعىس جەرورتا تەڭىزى ايماعىندا 12 پايىزعا قىسقاردى.