قازاقستان وزگە ەلدەرگە ۇلگى بولدى.
دۇنيەجۇزىلىك دەنساۋلىق ساقتاۋ ۇيىمى الماتى وبلىسى ەڭبەكشىقازاق اۋدانارالىق كوپ سالالى اۋرۋحاناسى بازاسىندا العاشقى مەديسينالىق-سانيتارلىق كومەك كورسەتۋ بويىنشا ءوزىنىڭ دەمونستراسيالىق پلاتفورماسىن اشتى، دەپ حابارلايدى Almaty-akshamy.kz.
بۇل تۋرالى ددسۇ وكىلدەرى مەن وزبەكستاننىڭ مەديسينا سالاسى ماماندارىنىڭ وبلىسقا ارنايى كەلگەن ساپارى بارىسىندا بەلگىلى بولعان.
«وبلىس اكىمى قانات بوزىمبايەۆ مۇنداي پلاتفورما ءۇشىن الماتى وبلىسىنىڭ تاڭداپ الىنۋى حالقىنىڭ 78% اۋىلدىق جەردە تۇراتىن ءوڭىر ءۇشىن اسا ماڭىزدى ەكەنىن اتاپ ءوتتى. جاڭا نىسان العاشقى مەديسينالىق كومەك ساپاسىن ارتتىرۋمەن قاتار ءوڭىردى جوعارى بىلىكتى ماماندارمەن قامتۋعا دا ءوز سەپتىگىن تيگىزەتىنىنە سەنىم ءبىلدىردى»، - دەلىنگەن الماتى وبلىسى اكىمىنىڭ باسپا ءسوز قىزمەتىنىڭ حابارلاماسىندا.
ددسۇ ەۋروپالىق وڭىرلىك بيۋروسىنىڭ ديرەكتورى حانس كلۋگە ءوز سوزىندە جاڭا پلاتفورمانىڭ ارتىقشىلىقتارىنا توقتالدى.
«قازاقستان – ددسۇ قولداپ-قۋاتتاعان دەمونستراسيالىق پلاتفورمانى اشىپ جاتقان ءبىزدىڭ ايماقتاعى العاشقى ەل. بۇل تۇرعىدا قازاقستان وزگە ەلدەرگە ۇلگى بولدى. سوزدەن ىسكە كوشىپ، بۇگىن ورتالىق قالالاردا ەمەس، شەت وڭىردە ماڭىزدى جوبانى ىسكە اسىرىپ وتىرمىز. وسى پلاتفورما ارقىلى مەملەكەتتەر العاشقى كومەك كورسەتۋدىڭ وزىق ۇلگىلەرىن بىر-بىرىنەن ۇيرەنىپ، ءوزارا تاجىريبە الماسادى. كوۆيد ىندەتى بىزگە نەعۇرلىم مىقتى، بەيىمدەلگەن، قاجەتتى رەسۋرستارمەن قامتىلعان العاشقى مەديسينالىق كومەك جۇيەسىن قالىپتاستىرۋ كەرەك ەكەنىن كورسەتىپ بەردى. سوندىقتان بۇل پلاتفورمانىڭ ماڭىزى زور»، - دەدى ح.كلۋگە مىرزا.
دەنساۋلىق ساقتاۋ ءمينيسترى اجار عيناياتتىڭ ايتۋىنشا، وسى الاڭنىڭ قازاقستاندا قۇرىلۋى ەلىمىزدەگى العاشقى مەديسينالىق-سانيتارلىق كومەكتىڭ دامىعانىن ايعاقتايدى. قازاقستاننىڭ بۇل تاجىريبەسىن وبلىسقا ساپارلاپ كەلگەن وزبەكستان دەلەگاسياسى دا ءوز ەلىندە ەنگىزۋگە نيەتتەنىپ وتىر.
«ءبىز ەڭبەكشىقازاق اۋدانىنداعى اۋرۋحانا سياقتى ۇيىمداردىڭ وزىق يننوۆاسيالىق تەحنولوگيالاردى قولدانۋداعى تاجىريبەسى مەن جەتىستىكتەرىنىڭ كەڭ تارالۋىنا بارىنشا مۇمكىندىك جاسايمىز»، - دەدى اجار عينايات.
ەڭبەكشىقازاق اۋدانارالىق كوپ سالالى اۋرۋحاناسىنىڭ بازاسىندا اشىلىپ وتىرعان پلاتفورمانىڭ ەرەكشەلىگى سول – بۇرىن العاشقى مەديسينالىق-سانيتارلىق كومەكتە سىرقاتتىڭ جاراسىن تاڭىپ، ءدارىسىن ەگىپ، جاردەمىن بەرسە، ءقازىر دارىگەر مامانداردىڭ جانىنا الەۋمەتتىك قىزمەتشىلەر مەن پسيحولوگتار دا قوسىلىپ وتىر. ياعني العاشقى كومەك پروسەسى كەشەندى تۇردە قاراستىرىلادى. مۇندا انا مەن بالانىڭ دەنساۋلىعىنا، وتباسىن جوسپارلاۋعا، اۋرۋدىڭ الدىن الۋعا، دارى-دارمەكپەن دەر كەزىندە قامتاماسىز ەتۋگە ەرەكشە ءمان بەرىلەدى.