Instagram-دا دۇنيەجۇزىلىك دەنساۋلىق ساقتاۋ ۇيىمى قاجەت بولعان جاعدايدا جاڭا اۋرۋلار شىعارادى دەگەن اقپارات تارادى. بۇل شىندىققا جاناسپايدى، دەپ حابارلايدى almaty-akshamy.kz
ددسۇ 10 جىل بويى پاندەميا ۇيىمداستىرادى دەگەنگە سەنۋگە نەگىز جوق. 2023 جىلدىڭ 5 مامىرىندا ۇيىم COVID-19 ەندى دەنساۋلىق ساقتاۋ سالاسىنداعى توتەنشە جاعداي ەمەس ەكەنىن رەسمي تۇردە جاريالادى. سودان بەرى ەشقانداي جاڭا پاندەميا جاريالانعان جوق، سونداي-اق عالىمدار وسى كەزەڭدە بۇرىن بەلگىسىز بولعان اۋرۋلاردى تاپپاعان.
پوستتا ايتىلىپ وتىرعان ددسۇ-نىڭ 10 جىلدىق جوسپارى «پاندەميالىق جانە ەپيدەميالىق الەۋەتى بار پاتوگەندەردى گەنومدىق باقىلاۋدىڭ جاھاندىق ستراتەگياسى، 2022-2032 جج.» دەپ اتالادى. بۇل قۇجات بارشاعا قول جەتىمدى جانە كەز كەلگەن ادام ونىمەن تانىسا الادى. وندا 10 جىل بويى پاندەميا ۇيىمداستىرۋ تۋرالى ءسوز جوق. كەرىسىنشە، جوسپاردا بۇرىننان بەلگىلى پاتوگەندەردى باقىلاۋ جانە ونى كۇشەيتۋدى جانە ولاردىڭ جاھاندىق تارالۋ ءقاۋپى بولعان جاعدايدا شۇعىل ارەكەت ەتۋ قاراستىرىلعان.
تاراعان پوستتا پايدالانۋشىلار گوللانديالىق ۆيرۋسولوگ ماريون كۋپمانستىڭ سوزىنە سۇيەنەدى، الايدا ول ددسۇ پاندەميالار ۇيىمداستىرادى دەپ مالىمدەمەگەن. ونىڭ مۇنداي دايەكسوزدەرى ونلاين باق-تا دا، اشىق قول جەتىمدى بەينەماتەريالداردا دا تابىلعان جوق.
2020 جىلى ول الەمدە COVID-19 سياقتى اۋرۋلاردىڭ جاڭا وشاقتارى بوۋلى ىقتيمال دەپ ايتقان. الايدا، بۇل وسى وشاقتاردى ددسۇ تۋدىرادى نەمەسە قوزدىرعىشتار قاساقانا جاسالادى دەگەندى بىلدىرمەيدى.
دەمەك، تارالعان اقپاراتتاعى نەگىزگى مالىمدەمەلەردىڭ ءبارى جالعان. ددسۇ پاندەميا ۇيىمداستىرمايدى، ۇيىمنىڭ 10 جىلدىق جوسپارىندا بۇل تۋرالى ايتىلماعان، ال ۆيرۋسولوگ ماريون كۋپمانس بۇعان قاتىستى مالىمدەمە جاساعان جوق.