داۋىل، جاۋىن، بۇرشاق جاۋادى

بۇگىن ەل اۋماعىندا 14 مامىردا بولاتىن ءقاۋىپتى مەتەورولوگيالىق قۇبىلىستارعا  «قازگيدرومەت» رمك  بولجام جاسادى، دەپ حابارلايدى almaty-akshamy.kz.

سينوپتيكتەردىڭ مالىمەتىنشە، وڭتۇستىك سيكلونى جانە ولارمەن بايلانىسقان اتموسفەرالىق فرونتالدى بولىكتەر ق ر ارقىلى جىلجي وتىرىپ، نايزاعايلى جاڭبىر، سولتۇستىك پەن ورتالىقتا قاتتى جاڭبىر، بۇرشاق اكەلەدى.

«تەك ەلىمىزدىڭ باتىسى مەن وڭتۇستىك-شىعىسىندا جاۋىن-شاشىنسىز اۋا رايى كۇتىلەدى. رەسپۋبليكا بويىنشا جەلدىڭ كۇشەيۋى، سولتۇستىگى مەن ورتالىعىندا داۋىل، وڭتۇستىگىندە شاڭدى داۋىل سوعادى.تۇندە قوستاناي وبلىسىنىڭ سولتۇستىگىندە، اقتوبە وبلىسىنىڭ سولتۇستىگىندە، سولتۇستىك قازاقستان وبلىسىنىڭ باتىسىندا توپىراق بەتىندە 2 گرادۋس ۇسىك جۇرەدى»، دەپ جازدى ۆەدومستۆو.

قاراعاندى وبلىسىنىڭ باتىسىندا، وڭتۇستىگىندە، ۇلىتاۋ وبلىسىنىڭ ورتالىعىندا، اباي، قوستاناي وبلىستارىنىڭ وڭتۇستىگىندە، اتىراۋ وبلىسىنىڭ سولتۇستىك-باتىسىندا، شىعىس قازاقستان وبلىسىنىڭ وڭتۇستىك-شىعىسىندا، قىزىلوردا وبلىسى، باتىس قازاقستان وبلىسىندا جوعارى ءورت ءقاۋپى كۇتىلەدى.

قىزىلوردا وبلىسىنىڭ قازالى اۋدانىندا، تۇركىستان وبلىسىنىڭ باتىسىندا، ءشولدى اۋداندارىندا توتەنشە ءورت ءقاۋپى ساقتالادى.