قازاقستان رەسپۋبليكاسى گرەك-ريم، ەركىن جانە ايەلدەر كۇرەسى فەدەراسياسىنىڭ جاڭا باسشىسى بولىپ ازيا كۇرەس فەدەراسياسىنىڭ پرەزيدەنتى، UWW بيۋروسىنىڭ مۇشەسى داۋلەت تۇرلىحانوۆ سايلاندى، دەپ حابارلايدى almaty-akshamy.kz Prosports.kz سىلتەمە جاساپ.
ەستەرىڭىزگە سالا كەتەيىك، بيىل قازاننىڭ باسىندا قركف كەزەكتەن تىس ونلاين كونفەرەنسياسىندا گرەك-ريم، ەركىن جانە ايەلدەر كۇرەسى فەدەراسياسىنىڭ جاڭا باسشىسى بولىپ بۇعان دەيىن ەركىن كۇرەس بويىنشا ۆيسە-پرەزيدەنت قىزمەتىن اتقارعان ەرلان قوجاسباي سايلانعان بولاتىن. ول قىزمەتىنەن كەتكەن ساۋات مىڭبايەۆتىڭ ورنىنا كەلگەن ەدى.
قر مادەنيەت جانە سپورت ءمينيسترى اقتوتا رايىمقۇلوۆا مەن ۇلتتىق وليمپيادا كوميتەتىنىڭ پرەزيدەنتى تيمۋر قۇلىبايەۆتىڭ اتىنا اشىق حات جازعان ايماقتىق فەدەراسيا باسشىلارى سايلاۋ ناتيجەسىمەن كەلىسپەدى. وبلىستىق ۇيىم باسشىلارى سايلاۋ كەزىندە بولعان ورەسكەل زاڭ بۇزۋشىلىقتارعا توقتالىپ، قايتا سايلاۋ وتكىزۋدى سۇرادى.