لاگەرلەردە مامان تاپشىلىعى دا قاتتى سەزىلىپ وتىر.
دەپۋتات بالالار لاگەرىن جازعى دەمالىس ورنى نەمەسە ساۋىقتىرۋ ورنى دەپ اتاۋدى ۇسىندى، دەپ حابارلايدى Almaty-akshamy.kz
دەپۋتات كەڭەستىك يدەولوگيامەن سانامىزعا سىڭگەن لاگەر ءسوزىن جازعى ساۋىقتىرۋ ورتالىقتارى سوزىمەن اۋىستىراتىن ۋاقىت جەتتى دەپ سانايدى.
"لاگەر ءسوزىنىڭ شىعۋ تاريحى مەن تاريحتاعى لاگەرلەردىڭ تولقىنى تەك جامان سيپاتتا ەكەنىن بىلەمىز. اتى قورقىنىشتى كارلاگ، الجير لاگەرلەرىنىڭ پايدا بولۋ تاريحى بارشاعا ءمالىم. سوندىقتان ۇلتتىق سانا-سەزىمدى جاڭعىرتۋدا لاگەر اتاۋىن الماستىرۋدىڭ ءمانى زور دەپ بىلەمىن. لاگەر ەمەس، بالالاردىڭ جازعى دەمالىس ورنى نەمەسە ساۋىقتىرۋ ورنى دەگەنىمىز ءجون"، - دەگەن ۇسىنىس تاستادى مۇقايەۆ پرەمەر-مينيستر مەن وقۋ-اعارتۋ مينيسترىنە جولداعان دەپۋتاتتىق ساۋالىندا.
سونداي-اق ول لاگەرلەر اراسىندا ناقتى بەلگىلەنگەن باعا ساياساتى دا جوق ەكەنىن اتاپ ءوتتى.
"ءار اتا-انا بالاسىنىڭ جاقسى ساۋىقتىرۋ ورتالىقتارىنا بارعانىن قالايدى. ايتسە دە كوپ اتا-انانىڭ قالتاسىنا اۋىر كەلەتىنىن ەسكەرسەك، باعاعا ساي ساپا بولۋى كەرەك. مۇنى تەك مەملەكەتتىك ەمەس، جەكە مەنشىك لاگەرلەردەن دە تالاپ ەتىلۋى كەرەك"، - دەدى دەپۋتات.
ايتۋىنشا، لاگەرلەردە مامان تاپشىلىعى دا قاتتى سەزىلىپ وتىر. لاگەرلەردىڭ باسىم كوپشىلىگىنە بالالاردى قاراۋعا ۋاقىتشا جۇمىس رەتىندە ستۋدەنتتەر تارتىلىپ جاتادى.
"ءوز ءبىلىمىن تولىق جەتىلدىرمەگەن ستۋدەنتتەر مەكتەپ وقۋشىلارىن قالاي تاربيەلەيدى؟ سوندىقتان لاگەردە جۇمىس ىستەيتىن ماماندارعا ارنايى وقىتۋ كۋرستارى ۇيىمداستىرىلىپ، مامانداندىرىلعان ۇستازدار تارتىلۋى كەرەك"، - دەپ ەسەپتەيدى ماجىلىسمەن.
بۇدان بولەك، مۇقايەۆ لاگەر ۇيىمداستىرۋشىلارى مىندەتتى تۇردە مەملەكەتتىك مەكەمە تاراپىنان لاگەر مازمۇنى مەن ماتەريالدىق-تەحنيكالىق بازالارىنا سايكەس تەكسەرۋدەن ءوتىپ، ليسەنزيالانۋى كەرەك ەكەنىن ايتتى.