قازاقستان رەسپۋبليكاسىنىڭ مەملەكەتتىك ونەر مۋزەيىندە، بيىل 120 جىلدىعى اتالىپ ءوتىپ جاتقان حالىق سۋرەتشىسى ءابىلحان قاستەيەۆ اتىنداعى، «ءداستۇر – حالىق رۋحى. دالا قازىناسى» كورمەسى اشىلدى. ەكسپوزيسيا مۋزەي قورىنان ەلىمىزدىڭ ءداستۇرلى جانە قازىرگى زاماننىڭ ساندىك-قولدانبالى ونەرىنىڭ 60-تان استام تۋىندىسىن ۇسىنادى.
بۇل كورمە ەلىمىزدىڭ باي مادەني مۇراسىمەن تانىسۋعا مۇمكىندىك بەرەدى جانە قازاقتىڭ حالىق قولونەرشىلەرى مەن ءار ۇرپاققا جاتاتىن ساندىك-قولدانبالى ونەردەگى كاسىبي سۋرەتشىلەردىڭ جۇمىستارىمەن تانىستىرادى. وعان مۋزەي قورىنداعى سيرەك ەكسپوناتتار كىرەدى. كوپشىلىگى العاش رەت قويىلىپ وتىر. ولاردىڭ ىشىندە كيىز، توقىلعان جانە كەستەلەنگەن كىلەمدەر، گوبەلەندەر، ات-ابزەلدەرى، اعاش، تەرى، مەتالدان جاسالعان تۋىندىلار بار.
توقىلعان كىلەم – شىعىستىڭ كوشپەلى جانە جارتىلاي كوشپەلى حالىقتارىنىڭ ماتەريالدىق مادەنيەتىنىڭ ەڭ جوعارى جەتىستىگى. ونىڭ ويۋ-ورنەگىندە ەجەلگى ميفتەردىڭ جاڭعىرىعى، ادامداردىڭ سيقىرلى جانە ءدىني بەينەلەرى، عاسىرلار بويى جيناقتالعان قورشاعان الەم تۋرالى بەينەلەۋ اسەرلەرىنىڭ وراسان زور قورى ساقتالعان.
كيىز كىلەمدەرى مونۋمەنتالدى جانە كوركەم ءتۇستى. ولار كيىز باسۋ ارقىلى جاسالعان. كيىز كىلەمدەردىڭ تاعى ءبىر ءتۇرى – سىرماقتاردا موزايكا مەن كىرىستىرۋلەر، ءتۇرلى-تۇستى باۋ مەن ماتا بار اپپليكاسيا قولدانىلعان. كيىزدەن جاسالعان بۇيىمداردىڭ ويۋ-ورنەگى ءمۇيىزدى ويۋ-ورنەكتىڭ ءار ءتۇرلى نۇسقالارىنان تۇرادى، ولاردا بايلىقتىڭ، بەرەكە مەن اسقاقتىق سيمۆولى – قوشقار ءمۇيىز ورنەگى باسىم.
كوشپەلىلەر مادەنيەتىنىڭ ماڭىزدى اتريبۋتتارى ات-ابزەلدەرى ەكەنىن بىلەمىز. ەرتەدە اتا-بابالارامىز جابايى دالا جىلقىسىن قولعا ۇيرەتىپ، اتقا ءمىنۋدى مەڭگەرگەن. قازاق حالقى ءۇشىن كۇمىسپەن، التىن جالاتىلعان، جارتىلاي اسىل تاستارمەن اشەكەيلەنگەن ات-ابزەلدەر يەسىنىڭ ابىرويىن، الەۋمەتتىك جاعدايىن بىلدىرەتىن بولعان.
قازىرگى ساندىك-قولدانبالى ونەردىڭ ەڭ كەڭ تارالعان جانە باسىم تۇرلەرىنىڭ ءبىرى – گوبەلەن. كورمەدە وعان ارنالعان جەكە ەكسپوزيسيا بار. ەلىمىزدەگى گوبەلەننىڭ تاريحى 1937 جىلى، «كىلەمشى» ارتەلىنىڭ جانىنان اشىلىپ، 11 جىل جۇمىس ىستەگەن گوبەلەن شەبەرحاناسىنان باستاۋ الادى. قازاقستاندىق گوبەلەن مەكتەبىنىڭ كەلەسى دامۋ كەزەڭى 1970 جىلداردىڭ ءبىرىنشى جارتىسىنا جاتادى جانە توقىما بويىنشا ارنايى ءبىلىم العان سۋرەتشىلەردىڭ شىعارماشىلىعىمەن بايلانىستى. وسى كەزەڭدە گوبەلەننىڭ دامۋىنا كەسكىندەمە ايتارلىقتاي اسەر ەتتى. گوبەلەندە كۇردەلى كەڭىستىك جانە كولوريستيكالىق مىندەتتەر شەشىلەدى، كوپفيگۋرالىق، تاقىرىپتىق، ال كەيىنىرەك ابستراكتىلىك كومپوزيسيالار جاسالادى.
ەكسپوزيسيادا تاعى ءبىر تۇتاس ءبولىمى قابىرعاعا كەستەلەنگەن تۇسكيىزدەرگە ارنالعان. كيىز ءۇيدىڭ ساندىك بەزەندىرىلۋىندە ولار توردەن قۇرمەتتى ورنىن الىپ، وتباسىلىق باقىت پەن اماندىقتى بەينەلەيدى. تۇسكيىزدەرمەن قاتار، سۋرەتشى زەينەلحان مۇحامەدجاننىڭ حالىق كەستەسى مەن ستانوكتىق كومپوزيسيا داستۇرلەرىن شەبەر ۇيلەستىرەتىن اۆتورلىق پاننوسى ۇسىنىلعان.
– ۇسىنىلعان ەكسپوناتتار قازاق قولونەرشىلەرىنىڭ شەبەرلىگىنىڭ جوعارى دەڭگەيىن كورسەتىپ قانا قويماي، ۇرپاقتان ۇرپاققا بەرىلەتىن سان عاسىرلىق داستۇرلەردىڭ سيمۆولى بولىپ تابىلادى. بۇل قازىرگى زامانعى مادەنيەت تۇرعىسىنان حالىق ونەرىن ساقتاۋ مەن زەردەلەۋدىڭ ماڭىزدىلىعىن كورسەتەدى، – دەيدى مۋزەيدىڭ "قازاقستاننىڭ ساندىك-قولدانبالى ونەرى" ءبولىمى باسشىسى ناتاليا باجەنوۆا.
كورمە قازاق حالقىنىڭ باي مادەني مۇراسىن جاڭاشا قىرىنان تانىستىرۋعا مۇمكىندىك بەرەدى جانە حالىق ونەرىن بولاشاق ۇرپاققا جەتكىزۋدىڭ ماڭىزدى قۇرالى بولىپ تابىلادى.