كۇزگى-قىسقى كەزەڭدە جەدەل رەسپيراتورلىق ينفەكسيالاردىڭ، سونىڭ ىشىندە پنيەۆمونيانىڭ دامۋ ءقاۋپى ارتادى. پنيەۆمونيا – بارلىق جاستاعى ادامدار زارداپ شەگەتىن تىنىس الۋ جولدارىنىڭ ەڭ ءقاۋىپتى اۋرۋلارىنىڭ ءبىرى. ق ر دەنساۋلىق ساقتاۋ مينيسترلىگىنىڭ مالىمەتىنە سايكەس، 2024 جىلدىڭ باسىنان 9 اي ىشىندە ەلىمىزدە 76 مىڭنان استام جاعداي تىركەلگەن.
پنيەۆمونيا – وكپەنىڭ تىنىس الۋ جولدارىنىڭ وشاقتى زاقىمدانۋىمەن سيپاتتالاتىن جەدەل ينفەكسيالىق اۋرۋ. اۋرۋ نەگىزىنەن جوتەل، قاقىرىق، السىزدىك، ەنتىگۋ سيمپتومدارىمەن قاتار، دەنە قىزۋىنىڭ جوعارىلاۋىنان باستالادى.
الماتىداعى كارديولوگيا جانە ىشكى اۋرۋلار عزي №2 تەراپيا ءبولىمىنىڭ پۋلمونولوگ دارىگەرى ايدا ءجادىلدىڭ ايتۋىنشا، پاسيەنتتەردىڭ كەيبىرىندە، اسىرەسە ەگدە جاستاعى ادامداردا پنيەۆمونياعا ءتان شاعىمدار مەن فيزيكالىق بەلگىلەر بولماۋى مۇمكىن، ينتوكسيكاسيا سيندرومى باسىم بولادى. ياعني، پنيەۆمونيانىڭ ءاتيپتى ءتۇرى دەنە قىزۋى كوتەرىلمەي، قان كورسەتكىشتەرىندە ايتارلىقتاي وزگەرىس بولماي، ينتوكسيكاسيا سالدارىنان باس اۋرۋى، بۇلشىقەت نەمەسە تاماق اۋىرىپ قۇرعاق جوتەلمەن قاتار ءجۇرۋى مۇمكىن.
55 جاستاعى پاسيەنتتە تاماعى جىبىرلاپ، قۇرعاق جوتەل پايدا بولعان. ناۋقاس مۇنى سالقىنداۋمەن بايلانىستىرادى. 10 كۇن بويى ول ءوزىن-وزى ەمدەپ، پاراسەتامول، اسكوربين قىشقىلىن قابىلداعان، ءبىراق وزدىگىنەن قابىلداعان ەمى اسەر ەتپەگەن. جاعدايى كۇن سايىن ناشارلاپ، جالپى جانە بۇلشىقەت السىزدىگى كۇشەيە تۇسكەن. اۋرۋ باستالعاننان ەكى اپتا وتكەن سوڭ ناۋقاس ستاسيونارعا ءتۇستى. كەۋدە قۋىسىنىڭ كومپيۋتەرلىك توموگرافياسىن جۇرگىزۋ كەزىندە ەكى جاقتى تومەنگى ۇلەستى پنيەۆمونيا انىقتالدى. زەرتحانالىق زەرتتەۋلەردە لەيكوسيتتەردىڭ شامالى جوعارىلاۋى، سوە جىلدامدىعى انىقتالدى. كەشەندى ەمدەۋدەن كەيىن ناۋقاستىڭ جاعدايى جاقساردى.
«ەگەر ۋاقىتىلى دياگنوز قويىپ، تەراپيانى كەشىكتىرمەي باستاسا، پنيەۆمونيا ەمدەلەدى. پنيەۆمونيا ادامنىڭ دەنساۋلىعى مەن ومىرىنە، اسىرەسە وسال ساناتتاعى ادامدارعا اسەر ەتۋى مۇمكىن. الدىن الۋ جانە ۋاقىتىلى مەديسينالىق كومەككە جۇگىنۋ اسقىنۋلاردىڭ الدىن الۋعا جانە ءولىم-جىتىم دەڭگەيىن تومەندەتۋگە ىقپال ەتەدى. العاشقى بەلگىلەر پايدا بولعان كەزدە دەرەۋ دارىگەرگە قارالىڭىز، جامان ادەتتەردەن باس تارتىڭىز، تۇماۋ مەن پنيەۆموكوككقا قارسى ۆاكسيناسيادان ءوتىڭىز. دارۋمەندەرگە باي تاعامداردى تۇتىنىڭىز، فيزيكالىق بەلسەندىلىكپەن اينالىسىڭىز جانە ۇيقىڭىزدى قاداعالاڭىز»، – دەيدى كارديولوگيا جانە ىشكى اۋرۋلار عزي №2 تەراپيا ءبولىمىنىڭ پۋلمونولوگ-دارىگەرى ايدا ءجادىل.